KINATIBUK-ANG 4,900 ka doses sa Sputnik V vaccine sa Gamaleya nga second component niabot sa Dakbayan sa Sugbo sa Miyerkules sa Septiyembre 22, 2021, matod ni Dr. Jeffrey Ibones, Cebu City Health Office officer-in-charge.
Si Ibones niingon nga kini gamiton sa pagbakuna sa second dose nga dugay nang gihuwat sa mga nabakunahan.
Kining 4,900 doses dugang kini sa 200 ka sa doses sa Sputnik V second component nga mas sayo nga niabot.
“Ato lang hangyuon ang atong mga kaigsuonan nga to wait for their schedule kay ang among giplanuhan nga tulo lang ka adlaw ato ning hutdon og hatag,” sulti ni Ibones.
Siya niingon nga magsugod sila sa pagpamakuna sa ikaduhang dose sa Sputnik V vaccines sa NOAH facility sa Huwebes, Septiyembre 23, samtang ang pagpamakuna sa University of Cebu Junior High School campus sa Dan Alcantara magsugod sa Biyernes, Septiyembre 24.
Si Ibones niingon nga sa katapusan sa semana, kining dugang nga Sputnik vaccines mahurot na.
Gawas sa Sputnik V, kinatibuk-ang 8,000 ka doses sa Pfizer vaccines nga gigahin alang sa Cebu City niabot.
Matod ni Ibones nga hayan makasugod sila og gamit niini sunod semana.
Ila pang tukion ang guidelines alang niini, matod sa information gikan sa Department of Health nga Pfizer vaccines di gamiton alang sa walk-in vaccinations.
Sa laing interview, si Cebu City Emergency Operations Center deputy chief implementer ug Konsehal Joel Garganera niingon nga usa ka pribadong tambalanan sa 15 ka public ug private hospitals sa Cebu City nagpabiling moderate level samtang ang uban naa sa safe zone. (WBS)