SUPERBALITA CEBU

Magbiseklita makaagi sa CCLEX nga libre

■ NAGKALINGAW: Duha ka mga manag amiga nalingaw sa pagpalabay sa oras pinaagi sa pagpakuha og mga hulagway diin ilang background ang hapit na madugtong nga Cebu-Cordova Link Expressway (CCLEX). Mga duha na lang ka metros ang gitrabaho, magkaabot na ang duha ka mga habig, hayan sa di pa matapos ang Septiyembre 2021. Paagian kini nga libre sa mga magbiseklita. Estorya sa pahina 3./Amper Campaña

KON mahuman na ang Cebu-Cordova Link Expressway (CCLEX) tugotan ang mga magbiseklita sa pag-agi nga libre, apan magdepende usab sa kahimtang sa panahon.

Gikumpirmar kini ni Alan Alfon, CCLEX president ug general manager, atol sa pakighinabi sa SunStar Cebu.

Matod ni Alfon nga sa higayon nga paagian na og mga sakyanan ang ikatulong taytayan sayo sa 2022, dunay mga lagda nga kinahanglang sundon sa mga bikers ilabi na atol sa bating panahon sa ilang pag-agi.

Gipasalig ni Alfon nga dunay operation groups ang moabag sa pagiya sa mga biker arun luwas sila sa pag-agi sa CCLEX.

“Anyway, naa tay operation groups that will help them manage that their access will be very safe,” matod ni Alfon.

Sigon ni Alfon nga ang CCLEX dunay gigahin nga bike lanes sa masig habig sa taytayan.

MOTORSIKLO

Samtang ang mga motorsiklo ubos sa 400 cubic capacity (cc) mobayad og toll fee, apan ubos lang kini itandi sa mga four-wheeled vehicle.

Gitun-an pa usab ang mamahimung toll sa gagmay nga mga motorsiklo.

Dugang ni Alfon, P10 ang toll sa four-wheeled vehicle sama sa sedan matag kilometro o P89 matag agi base sa ilang concession agreement nga gilagdaan sa mga grantor. Ang fee gibase sa kinatibuk-ang gitas-on sa taytayan.

Mas taas usab ang toll sa bug-at nga mga sakyanan apan sutaon pa ni Alfon ang tukmang kantidad niini.

Gibutyag niya nga ang CCLEX adunay orihinal nga gitas-on nga 8.5 kilometers apan ila kining gipatas-an ngadto sa 8.9 km. isip extension gikan sa Cordova paingon sa Cebu City.

“Yes we will allow. Kaning mga bicycle wa ni silay bayad kay we have provided a lane for them. Ang motorcycle, that is something that we are reviewing with the smaller ones, kanang gagmay nga motorsiklo, basin lesser ra na sila compared sa mga four-wheeled nga vehicle. Base sa atong concession agreement that we signed with our grantors, P10 per kilometer, apil nana ang back since this is 8.9 km. Originally 8.5 ra ni siya, we decided to put an extension diri sa off-from inig kanaog nimo from Cordova towards Cebu City so murag moabot na siya og 8.9. So mahug og P89 per entry for class-one vehicle,” matod ni Alfon.

Sigon niya nga 90 ngadto 95 porsyento nga makompleto ang CCLEX karong hinapos sa 2021 samtang hingpit mahuman sa unang kwarter sa 2022.

Dugang ni Alfon nga sa pagkakaron, gitrabaho nila ang electronic toll collecton (ETC) sanglit di man sila modawat og cash payment kon ma-operational na ang CCLEX.

“We are working on a system that is called Electronic Toll Collection (ETC)., Once we accept commuters or users to our expressway as much as possible, well, we will not accept cash payments na. It will be electronic toll system so we will do the marketing of potential users nga magpalit sila ug we aquire the stickers and the RFID. Once naay load ang ilang account, ipaduol nila didto sa toll plaza, ma-read man na didto ilang cards or stickers then automatic na sila mo-open. Then ilang pag-load sa ilang account through e-wallet, daghan mga pamaagi ba,” matod ni Alfon.

Gikompirmar usab ni Alfon nga dunay mga kompaniya nga buot makig-co-brand sa CCLEX alang sa RFID. Samtang ang supplies sa RFID padayon pa ang negosasyon.

COVID PUD

Usa sa nagpadayong hagit nga giatubang nila karon kon dunay mag-positibo sa Covid-19 sa ilang mga trabahante.

Sigon ni Alfon nga dunay usa ka empleyado ang namatay tungod sa Covid-19 duha ka buwan na ang nakalabay.

Gipasalig ni Alfon nga subsub nga contact tracing ug i-isolate dayon ang nagpositibo ug gilain sa ilang designated rooms alang sa mga nataptan sa virus sa barracks sa South Road Properties.

Ang pasilidad aprubado sa Department of Health (DOH), Inter-Agency Task Force (IATF) ug Department of Labor and Employment (Dole).

Sa pagkakarun, sigon ni Alfon, gi-in house nila ang tanang trabahante sa barracks, apartment ug hotel aron malikayan ang posibleng pagtakboy sa Covid-19.


VIEW COMMENTS
DISCLAIMER:

SunStar website welcomes friendly debate, but comments posted on this site do not necessarily reflect the views of the SunStar management and its affiliates. SunStar reserves the right to delete, reproduce or modify comments posted here without notice. Posts that are inappropriate will automatically be deleted.


Forum rules:

Do not use obscenity. Some words have been banned. Stick to the topic. Do not veer away from the discussion. Be coherent. Do not shout or use CAPITAL LETTERS!