PORMAL nang gibuksan sa kagamhanan sa Dakbayan sa Lapu-Lapu ang laing isolation facility sa Miyerkules, Septiyembre 22, ang Mactan National High School sa Barangay Mactan.
Ang pasilidad adunay 260 ka kapasidad sa higdaanan nga moatimam og mild, moderate ug asymptomatic nga pasyente sa coronavirus disease 2019 (Covid-19) aron maminusan ang pagdasok sa mga pasyente sa tambalanan sanglit aduna kini infirmary station itandi sa unang isolation facility.
Ang severe ug asymptomatic nga pasyente maoy adto sa tambalanan.
Matod ni Lapu-Lapu City Mayor Junard Chan nga ang pasilidad pagatawgon ug Temporary Treatment and Monitoring Facility (TTMF) 2 magsilbing laing opsyon sa kagamhanan sa 206-bed nga isolation facility sa Lapu-Lapu City College.
“Duna ni kitchen, ug staff nga moandam sa ilang pagkaon nga makasiguro ta nga presko ang ilang pagkaon pirmi, nga utan, sabaw, lainlain pa ug mao ‘ni ang nakalahi sa pikas nato nga isolation facility,” matod ni Chan.
Samtang, gibutyag ni Andy Berame, ang manager sa pasilidad, adunay 2 ka doktor, 6 ka nurses, 3 ka nursing aides, medical techinician ug 13 ka utility workers nga mosigurong magpabiling limpyo ang naasoyng pasilidad.
Gawas sa duha ka mga doktor, dunay laing emergency doctor ang pasilidad nga mahimong matawag sa mga emerhensiya.
Kaduha usab sa usa ka adlaw kuhaan ug vital sign ang usa ka pasyente aron masiguro ang ilang kahimtang sa panglawas.
Ang usa ka vaccinated nga pasyente nga ma admit sa pasilidad mahimo rang dili motiwas sa 14 ka adlaw nga pag-isolate ug mahimo nang makauli sa iyang balay human sa 7 ka adlaw.
Adto motiwas ang pasyente sa laing pito ka adlaw sa iyang panimalay sa pagkompleto sa kuwarentina. (GCM)