SUPERBALITA CEBU

Editoryal: Way lugakay

Editorrial art by Ariel Itumay

SA usa ka tigom tali kang Presidente Rodrigo Duterte, si Cabinet Sec. Carlito Galvez Jr., National Task Force Against Covid-19 chief implementer, nidayeg sa Sugbo sa pagpaminos sa mga kaso sa coronavirus disease 2019 (Covid-19).

Matod niya nga “good news” sa Sugbo kay nagkaminos ang nangaospital sa mga pribadong tambalanan sa Sugbo, labina sa Cebu City hinungdan nga ang utilization rate naa lang 40.1 porsyento sa Septiyembre 18, 2021.

Ang pasabot sa utilization rate mao ang gidaghanon sa mga kwarto ug katre nga nagamit tumbas sa kinatibuk-ang gitagana alang sa Covid-19.

Matod ni Galvez nga nakab-ot kini tungod sa pagsunod sa Sugbo sa mga protocol sa Inter-Agency Task Force (IATF).

Si Dr. Mary Jean Loreche, chief pathologist sa Department of Health (DOH) 7, niingon nga tungod sa pagpatuman sa mga protocol ug mga lakang sukad sa una ug ikaduhang wave, napaminusan sa Sugbo ang mga kaso.

Dunay liquor ban, estriktong pagpatuman sa curfew nga bisan ang mga suok sa barangay gironda sa mga pulis ug personnel sa Cebu City, pagdili sa mga tapok ug uban pa. Namatud-an na lagi ni nga epektibo nga mga pamaagi sa pagpugong sa pagsaka sa mga kaso sa Covid.

Apan kon mokanaug ang gidaghanon sa mga kaso, molugak usab ang mga awtoridad ug opisyal sa pagpatuman sa mga protocol ug mga lagda. Diha hinayhinay na sab nga mosaka ang mga kaso sama sa nahitabo dihang ilawom sa modified general community quarantine (MGCQ). Makita gud nga samang wa nay Covid, ang mga talan-awon sa kadalanan ingon sa nibalik sa normal nga panahon.

Kon mosaka og balik, anha na usab hugtan ang pagpatuman sa mga protocol ug uban pa. Lisod ba diay ang paghimong permanente sa hugtanay nga pagpatuman sa curfew, pag-monitor sa kasuokan sa mga barangay ug liquor ban?

Mao bitaw ni ang hinungdan kon nganong ang nasod magsige og balik sa uno, ingon sa way kahumanan ang Covid-19. Ang gikinahanglan mao ang makanunayon, malahutayon nga mga lakang batok sa sakit nga giantos dul-an sa duha na ka mga tuig.

Lugakan lang gud kon motabok na ang tanan sa new normal.


VIEW COMMENTS
DISCLAIMER:

SunStar website welcomes friendly debate, but comments posted on this site do not necessarily reflect the views of the SunStar management and its affiliates. SunStar reserves the right to delete, reproduce or modify comments posted here without notice. Posts that are inappropriate will automatically be deleted.


Forum rules:

Do not use obscenity. Some words have been banned. Stick to the topic. Do not veer away from the discussion. Be coherent. Do not shout or use CAPITAL LETTERS!