MISAMOT og kalubog ang giatangan nga All-Filipino unification bout tali nila ni World Boxing Council (WBC) bantamweight champion Nonito Donaire ug World Boxing Organization (WBO) bantamweight king Johnriel Casimero human sa kamanduan nga gibuhian sa WBO.
Kagahapon, Septiyembre 23, 2021, ang WBO nimando sa kampo ni Casimero (31-4, 21KOs) nga makignegusasyon na’g sugod aron depensaan sa gitawag og Quadro Alas ang iyang korona batok sa mandatory challenger nga si Paul Butler (33-2, 15KOs) sa United Kingdom.
Gipasabot sa WBO nga ilaha nang gipahibalo kabahin niini ang duha ka mga kampo.
“The WBO World Championship Committee hereby orders the parties herein commencement of negotiations for the above-mentioned WBO Bantamweight Mandatory Championship Contest,” pamahayag ni Luis Batista-Salas nga napatik sa www.boxingscene.com.
Si Batista-Salas, kinsa maoy tsirman sa WBO Championship Committee, nibutyag nga gitagalan ra nila og 20 ka mga adlaw ang duha ka mga kampo ug kon wala’y negosasyon nga mahitabo, hayan ipaagi kini sa purse bidding.
“Please be advised that the parties have twenty (20) days upon receipt of this letter to reach an agreement,” dugang ni Batista-Salas.
“If an accord is not reached within the time frame set forth herein, a Purse Bid will be ordered pursuant to WBO Regulations of World Championship Contests.”
Niamag na unta ang poruhan nga mahinayon ang panagharong nila ni Donaire ug Casimero human nagkauli ang buot sa duha ka Filipino world champions, gani nakapangayo na og pasaylo si Casimero sa iyang mga nabuhat ngadto sa Filipino Flash kaniadto.
Gipasaylo ra sab dayon si Casimero ni Donaire apan bisan pa niini, hanap pa gihapon sa diyes panas nga magkrus ang ilang dalan.
Ning bag-uhay lang, si Donaire gimanduan sab sa WBC nga modepensa sa usa ka mandatory fight batok sa laing Pinoy nga si Reymart Gaballo. (ESL)