MIDIKIT sa pultahan sa panamilit ang defending champion Brgy. Ginebra Gin Kings human sa 66-79 nga kapildihan niini batok sa No. 2-seed Meralco Bolts kagahapon, Septiyembre 23, 2021, sa Philippine Basketball Association (PBA) Philippine Cup sa Bacolor, Pampanga.
Ang Gin Kings ninghuman sa ilang tahas sa elimination round nga adunay 2-7 nga rekord, ikasiyam sa standing.
Aron magpabiling buhi ang paglaom sa Gin Kings alang sa quarter=finals, kinahanglang modaog ang NorthPort Batang Pier (5-5) batok sa Alaska Aces (3-7), nga padayon pang nagsangka kagahapon ning pagsuwat.
Kon nahitabo kini, hayan makakuha og libreng tiket ang Gin Kings pasulod sa quarter-finals.
Sa ilang bahin, ang Bolts wala milugak bisan nakaseguro na silang daan sa No. 2 spot. Gihuman sa Bolts ang ilang eliminasyon dala ang 9-2 nga rekord nga naghatag kanila og twice-to-beat nga bintaha sa quarter-finals.
“Ginebra is really the ‘Never Say Die’ team over the years and we just wanted to have the momentum going into the playoffs,” batbat ni Meralco head coach Norman Black.
“We didn’t want to come off a loss.”
Puntos matag usa:
Meralco (79) - Belo 15, Pasaol 15, Newsome 10, Quinto 8, Jamito 7, Maliksi 7, Almazan 6, Caram 4, Hodge 3, Baclao 2, Pinto 2
Ginebra (66) - Pringle 19, Standhardinger 17, Tenorio 11, Chan 7, Mariano 6, Devance 4, Dillinger 2, Caperal 2. (ESL)