MURAG dili na maliso ang desisyon ni Presidente Rodrigo Duterte nga molansar pagka-bise presidente sa nasud niining umaabot nga piniliay. Ang iyang katarungan kay aron dili siya mapasakaan og kaso kay nagtuo siya nga adunay immunity from suit ang bise presidente.
Debatihunon pa kini. Adunay nagtuo nga bisan og ubos sa Batakang Balaud impeachable official ang bise presidente, apan wala kini magklaro kon aduna bay immunity from suit. Samtang si Justice Secretary Menardo Guevara wa magtuo nga immune from suit ang bise presidente, apan si election lawyer Romulo Makalintal nagtuo nga tanang impeachable official, apil ang vice president, adunay immunity from suit.
Gituhoan kaniadto nga si Duterte dili mahinayon pagdagan aron hatagag higayon ang iyang anak, si Mayor Sara Duterte Carpio, apan karon nga gitinuod na ang iyang kaso sa International Criminal Court (ICC) mas milig-on ang iyang baruganan sa pagdagan. Unsa may mahimo sa usa ka piniling bise presidente sa Pilipinas kon dili ka hatagan og gahum sa presidente? Sa piniliay sab dinhi sa nasud dugay na kaayong higayon nga napili ang presidente ug bise nga kauban sa ticket. Nahitabo kini sa Ferdinand Marcos-Arturo Tolentino tandem ug sa panagpares ni Gloria Macapagal Arroyo-Noli de Castro. Human kanila, lainlain na ang partido sa nangapiling presidente ug bise presidente. Mao tingali kini katarungan nga dugay nga namili si presidential candidate Manny Pacquiao sa iyang himuong bise presidente. Sumala sa akong nasayran nga mobisita siya sa Sugbo sa dili madugay aron iyang maduaw ang iyang mga higalang Cebuano ug mga lider dinhi.
Gisuginlan ko ni businessman/sportsman Lorenzo “Chao” Sy nga ang nakaayo sa iyang paglisud og lakaw mao si Bro. Julius “Poloy” Poloyapoy nga anaa sa Toledo City. Sumala pa nga si Poloy naigo sa kilat sa dihang batan-on pa siya apan wala maunsa. Gituhoan nga adunay nagpabilin nga kuriyente sa iyang lawas. Nahibaw-an na lang nga makaayo siya og mga sakit pinaagi usab sa pag-ampo sa kahitas-an.
Bisan ang akong sakit sa likud nga iyang gihilot naayo usab. Ginatus ka mga tawo ang magpatambal kang Bro. Poloy matag adlaw. Tungod sa pagkaayo sa daghang masakiton, na-feature siya sa ABS-CBN ug GMA 7. Ako motuo nga adunay mga tawo nga hatagan sa Dios sa gasa kun “gift of healing” sama kang Tatay Dodong. Malipay ang kahitas-an kay wala kini gamita og panguwarta ug ubang binuang.(mannyrabacal1144@gmail.com)