GIANDAM na, matod pa sa Department of Education (DepEd), ang pipila ka mga tunghaan sa mga lugar nga ubos ang mga kaso sa Covid-19 nunot niining pagbalik sa limited face-to-face classes sa mga tinun-an sa kinder ug elementary. Kini human miaprobar na si Presidente Rodrigo Duterte nga kini mapahigayon sa mga lugar nga minus o gamay lang ang mga kaso sa Covid-19. Kini nunot usab sa pag-insister sa DepEd nga ibalik na ang face-to-face classes gumikan sa kalisdanan nga nasinati sa kabataan sa modular o distance learning.
Porbida, nagbalik-balik na lang kita ning isyuha. Nganong ipamugos man kini nga nia pa kita sa pandemiya? Asa mang lugar sa nasud nga way kaso sa Covid 19? Bisan gani ang Batanes Island nga toa sa tumoy sa nasud daghan man og kaso. Sa Estados Unidos, daghang mga estado nga misuway og balik sa ilang face-to-face classes, apan ilang gihunong kay daghang mga bata natakbuyan. Gusto sila nga mao nay mahitabo dinhi sa nasud? Ang kaluwasan sa atong kabataan mas importante kay sa edukasyon. Kon adunay mahitabo sa mga bata, kinsay manubag?
Matod pa sa Ecclesiastes 3:1-8, “For everything there is a season. A time for every activity under heaven. A time to be born and a time to die.” Unsa bay gatukmod sa DepEd sa paghingusog nga experimentuhan ang mga bata ug mga maestra sa face-to-face classes? Tungod ba sa mga pagpanaway nga na-iwit na ang Pilipinas sa ubang nasud nga mibukas nag balik sa ilang mga saring? Ato sigurong timbang-timbangon kon unsay bug-at.
Ang pagkapalpak sa distance learning ba o panglawas ug kaluwasan sa kabataan. Dili malalis nga mas angay hataga’g gibug-aton ang kinabuhi. Labaw nang ngil-ad ug salawayon kon lantawon nato nga nag-experimento lang kita kon moepekto ba o mapaltos kini.
Unsaon pagpangatarungan sa DepEd nga karon na ang panahon alang niini nga naglumpayat pa ang kaso sa Covid 19 ug wa pay timaan nga molurang? Nganong tuyuan man natog hikap ang kalderong gabukal sa tubig? Ang nakaparat ra ba kay dili ilang mga anak ilang isugba ning lain na sab nga trial and error. Eksperimentuhan lang nila ang kinabuhi sa mga bata? (bobbygnalzaro@gmail.com)