GILAMAYAN na ang usa ka 66-anyos nga mag-uuma human mapatay samtang nanalipod sa iyang asawa sa gikalalis nga suspek didto sa Purok 4, Barangay Awao, Monkayo alas 4:30 sa hapon, Martes, Septiyembre 21, 2021.
Ang namatay mao si Vivenvio Marcellana, molupyo sa nahisgutang dapit.
Base sa inisyal nga imbestigasyon, nasayran nga nakalalis sa biktima ang suspek nga ginganlan og Jaymie Santo alyas Imbot nga molupyo sa samang dapit.
Matud pa nga taliwa sa lalis, giatake sa suspek ang asawa sa biktima nga si Clarita hinugdan nga gipanalipdan niya kini pinaagi sa pagtigbas sa suspek kon diin naigo sa ulo.
Apan sumala pa nga ang mga ig-agaw sa suspek nga sila Junnel Santo ug Rolly Asis mibalos gamit ang sundang ug ilang gitabangan o tigbas ang biktima.
Ang biktima nakahiagom og daghang mga samad tinigbasan sa lawas nga miresulta sa hinanali niining kamatayon.
Human sa insidente, ang mga suspek nga sila Junnel ug Rolly daling mikagiw paingon sa direksiyon sa Barangay San Jose, Monkayo samtang ang laing suspek nga si Jaymie gidala sa iyang mga paryente sa Davao De Oro Provincial Hospital-Montevista nga samdan sa tuong bahin sa ulo ug giingong naa sa kritikal nga kondisyon.
Nagpadayon ang imbestigasyon sa kapulisan sa Monkayo Municipal Police Station ug gipangita na ang mga suspek nga milayas. (Dexter T. Visitacion)