PASIUNANG pahibalo sa mga pamilya nga dunay gilubong nga kabanay sa sam-ang sa Sitio Tugas, Barangay Gun-ob, Dakbayan sa Lapu-Lapu.
Gibutyag ni Misaellee Tejano, executive secretary sa buhatan sa mayor sa Lapu-Lapu, nga ang naasoy nga sam-ang ayuhon.
Matod ni Tejano, ilang tagaan og notisya ang mga Oponganon nga adunay kabanay nga gilubong sa maong sam-ang.
Kini aron matagaan sila og 30 ka adlaw sa pagkuha sa mga bukog sa ilang minahal sa kinabuhi nga mitaliwan na ug ibalhin og laing sam-ang nunot sa gitakdang pag-ayo niini.
Matod ni Tejano nga karong buwana o sa di pa matapos ang 2021, ila nang masugdan ang first phase sa proyekto human nga aduna nay kontraktor nga na midaug sa pagtrabaho.
Sa first phase, magtukod ang kagamhanan og moabot sa 730 ka nitso ug gibanabanang matapos ang pagtukod niini sulod sa tulo ngadto sa upat ka buwan.
Moabot sa 4 ka phases ang rehabilitasyon ug sa kinatibuk-an, moabot og dul-an sa 3,000 ka mga nitso ang matukod sa maong sam-ang.
Sa maong gidaghanon, malaumon si Tejano nga maigo na kini nga malubngan sa mga Oponganon niining panahon sa pandemya.
Mokabat ngadto sa P5 milyunes ang gahin sa kagamhanan alang sa pag-rehabilitate sa sam-ang.
Una niini, ang Lungsod sa Cordova mitanyag unta sa dakbayan nga adto lang una ilubong sa ilang sam-ang ang mamatay nga mga Oponganon niining panahon sa pandemya apan ang kagamhanan sa Lapu-Lapu ang mopatukod sa mga nitso.
Alang kang Tejano, gitun-an pa kini sa pagkakaron sa kagamhanan og pila ka nitso ang ilang tukoron sa lungsod gumikan kay sila usab naglaom nga minus na ang makalas sa coronavirus dosease 2019 (Covid-19) sa mosunod 3 o 4 ka buwan.
“Ang katong remains sa ilang relatives nga di gyud makuha adto nato ipahimutang sa bone chamber nga atong tukoron pero maayo nang maklaro nato hilabi na nga padulong nang kalag-kalag basig magpangitaay na unya sa ilang relatives,” matod ni Tejano. (GCM)