USAka Iranian national ug laing tulo ka kauban nga nagbugaw sa pito ka mga babaye, na-entrap sa Criminal Investigation and Detection Group (CIDG) 7 sulod sa usa ka mall sa North Reclamation Area sa Dakbayan sa Mandaue niadtong Dominggo, Septiyembre 19, 2021.
Mao kini ang gibutyag ni Police Colonel Ireneo Dalogdog, hepe sa CIDG 7, kinsa wala mohingalan sa 35-anyos nga Iranian ug mga kauban tungod sa giingong padayon pa ang ilang operasyon sa kaso nga human trafficking.
Duhang ni Dalogdog, naluwas usa nila ang pito ka mga babaye nga nagpangidaron og 18 ngadto sa 25 anyos.
Dunay nitaho sa ilang buhatan labot sa naghitak nga prostitusyon sa Dakbayan sa Lapu-Lapu.
Ilang modus mao ang paghimo og party diin nahitabo ang transaksyon.
Sa pag-imbestigar sa CIDG 7 nasayran nga nagsugod ang kalihukan sa Iranian sa 2020 sa dihang nihinay ang iyang negosyo nga surplus nga sakyanan.
Niabot siya sa Sugbo sa 2019 ug tinguha niini nga mobalik sa ilang nasud, busa nisulod sa pagpamugaw.
Kalapasan sa Republic Act 10364 kun Expanded Anti Trafficking in Persons Act ang atubangon kaso sa langyaw.
Ang pito ka babaye nga naluwas, gitakdang i-turn over sa Department of Social Welfare and Develipment (DSWD) 7 .
Matod ni Dalogdog, ang mga babaye gitawag nga “willing victim” human mao kini ang ilang naandang panguwarta. (AYB)