WA na igkita sa mga pulis sa lungsod sa Consolacion ang wedding coordinator nga si Nasser Fuentes human ni daling nigawas sa usa ka tambalanan sa Dakbayan sa Mandaue sa Huwebes sa udto, Septiyembre 23, 2021.
Si Fuentes mao ang wedding coordinator nga giingong nitabla sa kasal sa magtiayong Arniel Satingisan ug Cherry Pie Purisima-Satingasin sa Miyerkules sa hapon, Septiyembre 22, 2021, sa San Roque Parish sa Lipata, Minglanilla.
Ang video sa naghukdong nga si Cherry Pie nga naghilak nag-viral. Ang video nga gi-post sa Superbalita Cebu dunay 13,000 ka reactions ug 7,000 kapin ka shares.
Si Police Corporal Ritchie Gilleran, imbestigador sa Consolacion Police Station nga nahinabi sa Superbalita Cebu, nagkanayon nga alas 11:30 sa buntag Huwebes, si Duentes nigawas sa Eversley Child Sanitarium and General Hospital sa Jagobiao, Dakbayan sa Mandaue.
Wa na nila maabti sa sa tambalanan kay matod sa gwardiya nga nagdali sa paggawas si Fuentes.
Ang gwardiya nipakita sa record nga nipirma og waiver si Nasser kay dili magpa-admit.
Si Fuentes gidala sa sakyanan sa Barangay Casili, Consolacion human naglaslas sa wala nga pulso gamit ang blade sulod sa iyang giabangan nga lawak sa Purok Sampaguita.
Giadto usab ang giabangan niini nga balay sa Casili, apan wa usab didto.
“Milakaw na daw pag-ato sa arong mga kauban wala na na didto siguro nilayas kay daghang atraso,” dugang ni Gilleran.
Ilang nasayran nga daghan kini og gidala nga mga address. Sa wa pa siya mopuyo sa Casili, sa Brgy. Jagobiao usab kini nag-estar.
Si Fuentes gitabang sa mga silingan ug pipila ka barangay officials human kini naabtan sa sulod sa iyang lawak nga nagkadugo kay naglaslas.
Di unta kini magpadala sa ospital, apan nadala og alam-alam.
Wa pay tuig sukad nga nipuyo si Fuentes sa dapit.
Kuhaan unta siya sa iyang habig sa Superbalita Cebu, apan di na makita ang iyang Facebook page.
ORDINARYO UNTA
Si Cherry Pie, bride nga nahinabi sa GMA 7 Balitang Bisdak, niingon nga ordinaryong wedding lang unta ang ilang gusto ni Arniel hinungdan nga nag-budget lang unta sila og P50,000 nga budget alang sa dekorasyon sa simahan ug venue human sa kasal nga naglakip na sa pagkaon.
Apan si Fuentes nitanyag kanila nga dugangan og P15,000 alang sa bridal car, photographer ug videographer.
Niadtong Marso 5, nihatag sila og P5,000 kang Fuentes ug gidugangan og P5,000 sa Hunyo.
Sa Martes, Septiyembre 21, ilang gitingob og bayad ang P55,000 kang Fuentes.
Matod ni Cherry Pie nga mga alas 5 sa buntag didto na si Fuentes sa ilang balay sa Lipata kay naghatod sa gowns ug sa mga make up artist, apan mga alas 11 sa buntag nilakaw kay mopalit og wine, apan wa na kini mobalik.
Gani, atol sa kasal sa simbahan, ang bridesmaids, photographer ug videographer mao na ang nagtinabangay aron mahan-ay ang programa sa kasal.
Matod ni Cherry Pie nga sa ilang pag-abot sa Kiara’s Catering Services sa E. Sabellano St., Lourdes Village, Tisa, Dakbayan sa Sugbo, sirado ang establisemento kay way naka book nga event sa mao nga adlaw.
Dinhi, wa na siya makapugong, nakahilak siya tungod sa nagsagol niyang gibati nga kaguol, kaulaw, kagutom ug uban nga nakuhaan og video ug na-upload sa social media. Ang video nag-viral.
Karong adlawa, Biyernes, Septiyembre 24, 2021, kon di pa mo contact ug magkigsulti si Fuentes kanila, ila nang ipa-blotter ang hitabo alang sa pagpasaka og kaso.
UNANG HIGAYON
Si Mielton Elsisura, photographer, niingon nga gi-contact siya ni Fuentes pinaagi sa chat sa Messenger niadtong Septiyembre 20, 2021 alang sa serbisyo sa pakuha og hulagway.
Una kadtong higayon nga nakatrabaho siya kang Fuentes.
“Ako siya gi-background check unya sa iya profile, naa man mga recent weddings niya na posted and successful, tuo sad kog legit na,” matod ni Elsisura sa chat sa Superbalita Cebu.
Matod ni Elsisura nga wa sila maproblema sa ilang pagkaon kay gitagad silag maayo magtiayon alang sa ilang pamahaw ug paniudto.
“Naa ray pamahaw didto, Sir. Buotan ra man sad ang couple. Gipapamahaw ug paniudto ra mi,” dugang ni Elisisura. (REV)