ANG One Cebu kinahanglang mohurot sa tanang mga bakuna kay kon dili, ang igahin niini gikan sa nasudnong kagamhanan ihatag sa laing mga lugar.
Mao kini ang pahimangno ni Dr. Mary Jean Loreche, chief pathologist ug spokesperson sa Visayas Vaccination Operations Center (VVOC) samtang iyang gibutyag nga ang One Cebu nga gilangkuban sa tulo ka highly urbbanized cities ug Lalawigan sa Sugbo, dunay oversupply sa bakuna.
“We do not have a lack of vaccines right now. We have an oversupply of vaccines. As a matter of fact, we have them all here,” sulti ni Loreche sa sa iyang pagpamulong sa Huwebes, Septiyembre 23, 2021 sa Cebu Chamber of Commerce and Industry general membership meeting and induction of new members online forum.
“We have been given our allocation and based on the meeting that I attended early this morning at the national (level), if we are unable to use the vaccines that are given to us, they will not be sending allocations to us until we use it up and they will divert what is allocated for One Cebu. I hope it doesn’t happen. It is time for us to promote na no branding dapat tayo,” siya nidugang.
KUWANG GANI
Dihang gikuhaan og pamahayag, si Cebu City Health Office officer-in-charge Dr. Jeffrey Ibones nisulti sa SunStar Cebu nga ang Siyudad way oversupply sa mga bakuna.
“In fact, sige man gani ta’g panawag nga nahurot na ang atong bakuna. Karong semanahona, nahatagan ta og vaccine which is Sputnik (Gamaleya’s Sputnik V vaccine), ato ng humanon karong until Saturday,” matod niya.
Si Cebu City Government nigahin og kinatibuk-ang 5,100 ka doses sa Sputnik V vaccine sa Miyerkules, Septiyembre 22. Kini gamiton sa second dose niadtong mga naghuwat sa second dose sa bakuna.
Si Ibones niingon nga ang Siyudad gitakdang makadawat og dugang 4,000 ka Pfizer vaccine doses sa Huwebes ug sugdan kini og gamit sa sunod semana.
“I think we are the only member of Metro Cebu nga ang atong vaccination muabot tag 3,000 to 4,000 ang adlaw. Nya ang ihatag nato di man sad daghan ang ihatag nato,” matod niya.
HINAY LAGI
Nakasabot ra si James Sayson, deputy officer sa Local Vaccination Operations Center sa dakbayan sa Lapu-Lapu, kon mao kini ang desisyon sa nasudnong kagamhanan.
Kini gumikan kay tinuod nga niminos ang nagpabakuna sa milabyang mga semana itandi niadtong Hulyo o Agusto.
Sa pagkakaron, ang Dakbayan sa Lapu-Lapu adunay kapin sa 4,000 ka mga bakuna nga gitagana alang sa mga first ug second dose.
Apan sa kasamtangang dagan sa magpabakuna, hayan maabtan pa kini sulod sa pipila ka semana una mahurot.
Gipadayag ni Sayson nga ila nang gibuhat ang tanan sa pag-edukar sa publiko, apan daw sa wala gihapon kini epekto sa dagan sa pagpamakuna. (JOB, WBS, GCM)