NIPAHIMANGNO na ang head office sa Department of Health (DOH) nga di na hatagan og bakuna batok sa Covid-19 ang Sugbo kon di mahurot ang tanang mga bakuna nga naa gitipigan sa mga local government unit (LGU).
Matod ni Dr. Mary Jean Loreche, chief pathologist sa DOH 7, niingon nga ang nasudnong buhatan nisulti nga di na padad-an ang Sugbo og dugang doses sa mga bakuna hangtod nga mahurot na kini sa paggamit.
Gihulagway ni Loreche nga dunay “over supply” sa mga bakuna dinhi sa Sugbo. Makaguol man gani kay dunay 90 ka doses sa AstraZeneca nga nausik kay di mao ang pagkuha.
Nahitabo ang “over supply” tungod kay hinay kaayo ang dagan sa pagpamakuna dinhi ug sa ubang mga dapit sa nasod. Sukad gud nga dunay nangamatay nga mga bakunado nga full pa gani, dunay mga tawo nga nagtuo nga way kapuslanan ang pagpabakuna.
Sukwahi sa pagtuo sa pipila, ang bakuna di garantiya nga di ka matakdan. Apan ang seguradong magarantiya sa mga eskspeto nga di mograbe ang imong kahimtang kon maigo ka sa coronavirus disease 2019 (Covid-19). Kay ang imong lawas duna na may ikaaway sa kagaw kay nabakunahan ka man.
Apan kon luya na daan ang imong lawas kay duna kay sakit nga daghan kun comorbidities, dunay kahigayunan nga mapukan ang imong depensa. Apan sa mga pagtuon sa mga eksperto, mas dako ang kahigayunan mo-survive ang mga tawo nga dunay comorbities kon maigo sa Covid kay sa niadtong wa mabakunahi.
Niadtong maayo ra ang panglawas apan naigo sa Covid-19, sobra sa 90 porsyento kanila asymptomatic kun way mga timailhan sa sakit.
Sukad gisugdan ang pagpamakuna dinhi sa nasod o bisan sa Sugbo, way gitaho nga nakasinati og grabeng epekto sa bakuna. Dunay pipila nga mild ra ang ilang nasinati.
Sa tinud-anay, ang bakuna naghatag og lig-ong proteksyon, wa magdala og perdisyon sa lawas. Pabakuna na.