DILI na nila maantus ug gikapoy na sila sa bukid, kini ang nag-unang rason nganong mitahan ang pito ka mga indibiduwal nga mga sakop sa rebeldeng New People's Army (NPA).
Mitahan ang pito diin duha niini mga menor de edad ngadto sa mga sakop sa 60th Infantry (Mediator) Battalion sa Kapalong, Davao del Norte.
Ang mga misurender mga miyembro sa Guerilla Front 3 sa Sub-Regional Committee 4 sa Southern Mindanao Regional Committee.
Daling gi-turnover sa Municipal Social Welfare and Development Office sa Kapalong ang duha ka mga menor.
Apil sa gitahan sa mga nahisgutan ang ilang upat ka mga high-powered firearms.
Sumala ni Captain Mark Anthony Tito, tigpamaba-opisyal sa 10th Infantry Division sa Philippine Army, moagi sa custodial debriefing ang mga misurender aron makadawat sila og benepisyo ubos sa Enhanced Comprehensive Local Integration Program. (Jeepy P. Compio)