MANUBAG sa balaod ang mga kandidato nga mohatag og campaign fund sa New People's Army (NPA) sa taliabot nga kampanya sa eleksiyon sa probinsiya sa North Cotabato.
Kini mismo ang gibahad ni Brigadier General Potenciano Camba, nangulo sa 1002nd Brigade sa Philippine Army.
Base sa intelligence report sa militar, nasayran nga nagtapok ang mga opisyal sa NPA ug plano nga mangayo og campaign fund sa mga kandidato.
Apan giklaro ni Camba nga seguradong mag-atubang og kaso ang mga kandidato nga mosuporta ug mohatag og kuwarta sa mga rebelde.
Giangkon ni Camba nga daghan nga politiko niadtong milabay nga piniliay ang mihatag og pundo sa NPA base sa gibutyag sab sa mga misurender nga mga rebelde.
Giklaro sa opisyal nga naglisud na sa pagpangikil ang mga NPA tungod sa mga programa nga gipatuman sa gobyerno.
Labaw sa tanan, nawad-an na ang mga NPA og suporta gikan sa masa, sigon ni Camba.