GIBUTYAG ni Lapu-Lapu City Mayor Junard Chan nga dunay mapaabot nga quincentennial bonus alang sa mga kawani sa dakbayan karong tuiga.
Kini human nga nakita na sa mayor nga padulong na matapos ang tuig 2021 ug sa ingon mabanabana na niya nga adunay sobra sa ilang pundo nga mayoriya nga ilang gigahin nga pundo alang sa coronavirus disease 2019 (Covid-19) response.
Ang mga kawani naglaom unta sa kagamhanan nga niadtong Mayo sila matagaan sa maong bonus apan mas gipili ni Chan nga sa dayong tapos na sa tuig kini ihatag kung aduna samtang nagkombati pa sila sa Covid-19.
Dili pa makasulti si Chan pila ang madawat sa mga empleyado sanglit magdepende pa unya kini pila ang mahabiling pundo sa kagamhanan sa dili pa matapos ang tuig.
Una na untang misaad ang kagamhanan ug P25,000 nga Quincentennial Bonus sa mga kawani niadtong Abril apan gumikan sa nagpadayong pandemya nga nasinati hayan posible nga mas gamay na lang sa maong unang kantidad ang madawat sa mga empleyado.
“We are not against giving bonus because they are also deserving because some of them are frontliners nga nagtrabaho gyud mao gyuy nag man nga para nato worthy gyud sila ug angayan tagaan kay sila ila girisgo ila kinabuhi but ato pang gitan-aw naa bay insaktong pundo ang atong syudad para niana,” matod ni Chan sa Superbalita Cebu.
Samtang, ang konseho sa Dakbayan sa Lapu-Lapu nga sa ilang bahin, gikatakdang mopasar og resolusyon sunod sisyon lang sa pagpagawas na unya og pundo kalabot sa maong katuyoan.
Sa sisyon niadtong Septyembre 23, gi-defer lang una sa konseho ang pagpagawas sa pundo sanglit mangayo pa sila og opinyon kalabot niini gikan sa buhatan ni Presidente Rodrigo Duterte.
Alang kang Chan, masaligon siya nga isangon ra ang maong desisyon sa presidente ngadto sa local government unit (LGU) kung duna ba silay pundo alang niini.
Malaumon ang mayor nga aduna gyuy mabilin nga kuwarta kun dili magamit ang tanang pundo sa ilang nagpadayong Covid response sa dakbayan. (GCM)