TALAGSAON Makaluoy. Ang pagkailad sa magtiayon nga gikasal San Roque Parish, Lipata, Mingalanilla niadtong Miyekules, Septiyembre 22, 2021. Human sa seremonyas sa simbahan, ang matiayon uban sa pamilya ug mga bisita ninglahos sa Barangay Tisa, Siyudad sa Sugbo apan nakurat dihang sirado ang kan-anan. Walay naka-book nga reception?
Kinsay dili makahilak sa nahitabo. Ang asawa nga si Cherry Pie Purisima, taga Minglanilla, nag-viral sa social media ug daghang netizens ang naluoy kaniya uban sa iyang bana nga si Arniel Satingasin, molupyo sa samang lungsod.
Hinungdan sa tanan mao ang wedding coordinator nga si Naser Fuentes, 33, kinsa wa mo-book sa reception ug wala usab motunga sa kasal. Apan gibulsa ang bayad nga P65 mil.
Daghang nanghimaraut sa bayot nga coordinator sa kasal kinsa nadakpan niadtong Huwebes sa hapon, Septiyembre 23, sa Barangay Casili, lungsod sa Consolacion. Mag-atubang kini og kasong pagpangilad. Samtang, nasayran nga dunay kini kaso nga estafa niadtong 2013. Nahukmang sad-an sa korte apan nakapiyansa. Karon, walay piyansa ang grekomendar sa warrant of arrest gikan sa korte.
Panagsa kini nga hitabo apan naghatag og leksiyon sa tanan. Dili mosalig dayon labi na og naglambigit og kuwarta. Dobleng susihon sa akto ang kasabotan. Apan dili sala sa magtiayong Satingasin, nataymingan sila sa panahon. Yano lang ang giplano nga kasal sa magtiayon. Nagkab-ot lang nila ang maong kantidad human ginagmay nga pagpangayo sa bayot nga coordinator.
Leksiyon na kini sa maong bayot nga segaradong magtinggol sa mabugnaw nga bilanggoan. Leksiyon usab sa ubang nagtanyag og serbisyo nga matinarong sa trabaho. Ang nahiagoman sa magtiayon kapanaminan sa uban. Samtang, salamat sa socia media, dunay artista nga nitanyag nga mo-sponsor sa mas bongga nga post-wedding reception sa bag-ong kasal.