SUPERBALITA CEBU

265K na ang mga nabakunahan sa Cebu City; Rama magpa-raffle

■ SPUTNIK. Gatusan ka mga tawo ang nagpabakuna sa ilang second dose sa Sputnik V sa University of Cebu sa J. Alcantara Street, Barangay Sambag 1, Cebu City sa Septiyembre 24, 2021. Puwa ang suga kay ang mao nga matang sa bakuna nagkinahanglan og special lighting. / Amper Campaña

NIABOT na og 265,612 ka mga tawo sa Dakbayan sa Sugbo ang nakakumpleto na sa ilang bakuna batok sa coronavirus disease 2019 (Covid-19).

Kini ang gipahibawo ni Acting Mayor Michael Rama dungan sa iyang pagpahibawo nga molusad ang Cebu City Government, inabagan sa private sector, nga mahatagan og insentibo ang mga nagpabakuna.

Aron pagdasig sa mga tawo nga magpabakuna, gipahibawo ni Rama nga adunay madawat nga premyo ang maswertihan nga mga individual sanglit mopahigayon sila og electronic raffle.

Ang acting mayor nitug-an sa mga tigbalita nga adunay mga pilantropo nga mohatag sa mga pa-premyo pinaagi sa pag-pledge og balor P100,000 nga gift certificate sa ilang hotel.

Lain usab ang scholarship, house and lot, sakyanan ug motorsiklo, P100,000 worth sa groceries ug uban pa nga incentives.

Gidasig ni Rama ang tanan nga magpabakuna aron mabatukan ang pagkatap sa virus, mahimo nang walay restrictions ang umaabot nga Holy Week sunod, labina sa umaabot nga Pasko, Bag-ong Tuig ug umaabot nga Sinulog sa Cebu City.

Ang talaan sa Cebu City Health Department ni Dr. Jeffrey Ibones nagpahibawo usab nga anaa na sa 335,469 ka mga individual ang ilang nabakunahan alang sa first dose.

Sa kinatibuk-an, niabot na og 706,963 ka mga tawo sa Cebu City ang nagpalista sa Pabakunata.com nga maoy gidaghanon sa gustong magpabakuna.

Ang Cebu City, sa census sa 2020, dunay populasyon nga 964,169.

Si Ibones nagkanayon nga adunay igong bakuna ang City Government gikan sa Department of Health (DOH) para sa mosunod nga mga adlaw.

Sugod sa Septiyembre 24, 2021, gisugdan sa Siyudad ang pagbakuna sa second dose sa Sputnik V sa Gamalea human mangabot niadtong Miyerkules ang 5,100 ka doses.

Ang pagpamakuna gihimo sa University of Cebu sa J. Alcantara Campus ug New Oasis for Adaptation and a Home (NOAH) mega vaccination site.

Target sa CHD nga mahuman pagpamakuna sa Sputnik karong adlawa, Septiyembre 27, 2021.

Sa kasamtangan, ang Cebu City adunay 1,017 ka aktibong mga kaso sa Covid-19 nga kasamtangan pang nagpaayo sulod sa hospital, barangay isolation centers, hotel ug quarantine centers.

Sa nakalabay nga mga semana, padayong nagkaminus ang mga kaso sa Covid-19 sa Sugbo.

Gidayeg ug gipasigarbo kini ni Secretary Carlito Galvez, chief implementer sa National Task Force Against Covid-19.


VIEW COMMENTS
DISCLAIMER:

SunStar website welcomes friendly debate, but comments posted on this site do not necessarily reflect the views of the SunStar management and its affiliates. SunStar reserves the right to delete, reproduce or modify comments posted here without notice. Posts that are inappropriate will automatically be deleted.


Forum rules:

Do not use obscenity. Some words have been banned. Stick to the topic. Do not veer away from the discussion. Be coherent. Do not shout or use CAPITAL LETTERS!

sunstar.com.ph