KAPULISAN sa Siyudad sa Sugbo uban sa Probe mopadayon sa ilang pagpanakop sa mga biker ug rider nga mosaka sa Barangay Busay nga dili motuman sa minimum health standard sama sa pag sul-ob sa mask samtang nag bisikleta.
Daghan bikers nakasaway pinaagi sa social media kay daghan ang nadakpan sa Cebu City Police Office (CCPO) nga leisure bikers nga misaka sa Busay human masakpan nga wa mosul-ob sa ilang mask samtang nagbisikleta.
Sigun sa mga kritiko nga lisod iginhawa kon adunay mask samtang nagtungas sa karsada sa Busay.
Gihagit pa si Police Lieutenant Colonel Wilbert Parilla, deputy director for operations sa CCPO, nga iyang suwayan ang pag bike nga naka-mask.
Apan matod ni Parilla usa usab siya ka biker sama nila ug iya nang gisuwayan ang pagsaka sa Busay nga naka-mask.
Tinuod ang pangangkon sa mga biker nga lisud iginhawa apan wala na siyay mahimo sanglit mao kini ang lagda sa Kagamhanan sa Siyudad sa Sugbo nga angay tumanon sa tanan.
Kinahanglan nga kanunay mag-mask, sigun ni Parilla, aron maproteksyonan ang mga tawo nga ilang maagi-an sa dalan nga mahimo pa hinuon nga sila ang makapanakod.
“Yes, it’s really difficult, but as what we have said, we are in a new normal. We need to do this, we have to wear it. That is not only for the safety of the rider but also for the bystanders nga imong maagi-an and other persons,” matod ni Parilla.
Tungod niini, magpadayon ang ilang pagpanakop sa mga malapason sa lagda uban sa mga personnel sa Prevention, Restoration, Order, Beautification and Enhancement (Probe) team. (AYB)