Ilibreng reception sa magtiayong ‘gi-scam’

BISAN pa sa mga luha nga niagas, gisiguro ni actress Neri Naig-Miranda, asawa ni Chito Miranda sa Parokya ni Edgar, ug sa Skin911 nga mabalik ang ngisi sa “na-scam” nga managtiayon pinaagi sa pagtanyag og libreng reception ug skincare package.

Ang gitanyagan mao ang magtiayong Arniel Satingasin ug Cherry Pie Purisima-Satingasin, kinsang video human sa ilang kasal nga way reception kay wa na-book ang catering services nag-viral.

Nakita si Cherry Pie nga naghilak kay way reception kay wa nakapa-book si wedding coordinator Naser Fuentes sa Miyerkules, Septiyembre 22, 2021.

“Bilang naging bride din ako, ang pinakaayaw natin ay ma-stress sa mismong kasal natin. Kahit lahat ng tao sa paligid natin, hindi tayo dapat binibigyan ng stress. Kung sino po ang nakakakilala sa bride, pakisabi po, message po ako,” matod ni Naig-Miranda sa iyang social media post.

Si Naig-Miranda nanag-iya og Korean restaurant sa Sugbo. Apan matod niya nga tungod sa quarantine restrictions limitado lang ang mga bisita.

“Kami na bahala sa reception niya. Malapit lang naman ang Jeju Samgyupsal sa lugar nila. Dun na natin ganapin ang reception nyo,” matod aktres.

Gawas sa pagkaon, ilang abagahon ang wedding cake ug host.

“May pabaon kaming Terra accessories, Very Neri beddings, Very Neri sleepwear gift from Saturday Dress para sa bride,” dugang ni Naig-Miranda.

Mohatag usab sila og pocket money.

Gawas niini, ang Skin 911 mohatag og libre nga full groom and bride package tungod kay nasubo usab sila sa nahitabo sa managtiayong Satingasin.

Sa usa ka Facebook post ni Michelle Padayhag, marketing communication head sa Skin911 Group Inc., siya niingon nga isip suporta ngadto sa managtiayon muhatag sila og usa ka adlaw nga mag-pamper ngadto sa Skin911 Facial and Slimming Centre.

Sigon ni Padayhag nga angay nga hatagan og kahigayonan nga dili ma-stress ug magpaalim ang managtiayon sa ilang naagian.

MGA OFFER

Giangkon ni Cherry Pie nga nag-abot-abot ang mga offer gikan sa mga event organizer, tag-iya og mga kan-anan ug uban pang event services nga molibre kanila alang sa wedding reception.

Apan sa pagkakaron wa pa silay panahon aron pag-atuman niini.

Ang ilang giseguro karon mao ang pagpangita og paagi nga mabayran ang ubang wedding services nga apil sa package, apan wa mabayri ni Fuentes.

Giangkon ni Cherry Pie nga nasakitan ug nasuko siya kang Fuentes atol sa hitabo, apan karon, silang magtiayon nakapasaylo na sa wedding coordinator.

Sa interbyu sa GMA 7 Balitang Bisdak, matod ni Cherry Pie, nga nagkaestorya na sila kang Fuentes ug ila na kini napasaylo,

Ila pang timbangon og maayo kon mopasaka pa ba sila og kaso kay naluoy na sila sa pagkapriso sa MCPO.

Samtang sa exclusive interview sa Superbalita Cebu pinaagi kang photojournalist Alan Tangcawan, si Fuentes nikompirmar nga nagkaestorya na sila sa magtiayong Satingasin.

Iya kining gisaaran nga bayran ang iyang mga obligasyon. Si Fuentes gibayran og P65,000 sa magtiayong Satingasin usa ka adlaw sa wa pa ang kasal.

Nipasabot si Fuentes nga nagkuwang na siya sa budget human ang laing kasal niatras ug gibawi ang downpayment hinungdan nga siya nitapal.(KFD, LMY, REV)

Trending

No stories found.

Just in

No stories found.

Branded Content

No stories found.
SunStar Publishing Inc.
www.sunstar.com.ph