SUPERBALITA CEBU

60 ka doses sa AstraZeneca nausik

NIKABAT sa 60 ka doses sa AstraZeneca ang gideklarar sa Department of Health (DOH) nga nausik nga nahitabo atol sa mga unang adlaw sa programa sa pagpamakuna batok Covid-19.

Matod ni Doctor Van Philip Baton, medical officer IV DOH 7 atol sa press conference via Zoom, nga ang maong mga doses nausik sanglit di pa hanas ang mga medical personnel sa paggamit og EDC syringe nga gamiton sa pagsuyop sa vial sa bakuna.

Sigon ni Baton nga ang maong klase sa syringe di na mamahimung makabalik sa pagsuyop sa vial kung pananglit wa makuha ang insaktong gidaghanun sa fluid aron ibakuna.

“Kasagaran sa mga factor kay di kahibawo mo-operate sa EDC syringe once you pull it out di na mahimung ibalik. Di pa ingon ana ka trained during the early part of vaccination sauna,” sigon ni Baton.

Samtang naghuwat pa usab si Baton sa opisyal nga report kung pila ang kinatibuk-ang vaccine wastage sa Rehiyon 7 sa pagkakaron.

Iyang gipasalig nga way bakuna nga nausik tungod sa kakuwang sa kabugnawon sa temperatura alang sa mga bakuna bisan paman dunay nitumaw nga lapad nga blackout sa milabayng buwan.

Samtang nikabat sa 3,435,620 doses sa bakuna ang nadawat sa rehiyon sukad sa pagsugod sa vaccination program hangtod Septiyembre 22, 2021.

Ang 1,962,440 doses sa AstraZeneca; 666,900 doses sa Pfizer; 97,800 doses sa Moderna; 21,200 doses sa Gamaleya; 118,220 Sinopharm; ug 208,900 doses sa Jansen.

Sukad Septiyembre 22, nikabat sa 131,064 o 99.3 porsyento sa A1 group ang nabakunahan sa unang dose gikan sa target niini nga 131,989 ug 130,611 o 99 porsiyento ang nabakunahan sa second dose.

Anaa sa 45,534 ang nabakunahan sa unang dose sa expanded A1 group ug 35,366 ang nabakunahan niini sa second dose.

Sukad Septiyembre 20, anaa sa 164,247 o 27.6 porsyento ang nabakunahan sa unang dose alang sa A2 group gikan sa target niini nga 595,058 lukop rehiyon.

Nabakunahan na sa second dose sa A2 group ang 214,526 o 36.1 porsyento samtang ang 22,115 ang tinguhang bakunahan alang sa second dose sa maong category samtang anaa sa 72,394 ang nabakunahan sa Janseen.

Giangkon ni Baton nga hinay ang pag-irog sa gidaghanun sa nagpabakuna ubos sa A2 o senior citizens sanglit ang kasagaran hinungdan niini nga mahadlok ang mga katiguwangan ilabi na kung duna kini mga sakit.

Busa iyang giawhag ang local government units sa pagpalig-on sa kampanya arun maagni ang mga katiguwangan pagpabakuna.

Iyang gipasalig nga bisan dunay sakit daan ang mga seniors way angay ikabalaka sanglit luwas man ang mga bakuna. (MVE)


VIEW COMMENTS
DISCLAIMER:

SunStar website welcomes friendly debate, but comments posted on this site do not necessarily reflect the views of the SunStar management and its affiliates. SunStar reserves the right to delete, reproduce or modify comments posted here without notice. Posts that are inappropriate will automatically be deleted.


Forum rules:

Do not use obscenity. Some words have been banned. Stick to the topic. Do not veer away from the discussion. Be coherent. Do not shout or use CAPITAL LETTERS!

sunstar.com.ph