P1.8B kinahanglan paghuman sa CCMC

KINAHANGLAN og dugang P1.8 bilyunes nga budget sa pagkumpleto sa trabaho sa 11 ka andana nga bag-ong edipisyo sa Cebu City Medical Center (CCMC) alang sa hingpit nga operasyon sa publikong tambalanan.

Kini ang gipahibalo ni Lowell Corminal, officer in-charge sa Department of Engineering and Public Works (DEPW), base usab sa ilang gihimo nga program of works and estimates niadtong tuig 2019 nga nagkinahanglan og P2.8 bilyunes para sa pagpabarog sa maong ospital

Matod pa ni Corminal nga ang kasamtangang CCMC nga nag-operate na ang unang tulo ka andana, nigasto na og P1 bilyon ug kuwang nalang kini og P1.8 bilyunes.

Iyang gipasabot nga ang Cebu City aduna nay gitagana nga pundo balor og P1.5 bilyones diin ang P500 milyones gikan sa unang budget kansang pag-award sa proyekto gikanselar sa tungatungang bahin niining tuiga samtang ang laing P1 bilyon nalakip sa supplemental budget number 1 nga gipangayo ni Mayor Edgardo Labella mga giaprobahan sa konseho.

“Ang amo gipangayo ana sa una pag 2019 whole construction from the start mogasto gyud og P2.8 bilyon ang 11 floors base sa among estimate,” padayag ni Corminal.

Gipasabot niya nga ang P1.5 bilyunes nga pundo para idugang sa ika-7 hangtod ika-11 nga andana apil na ang roof deck sa maong tambalanan.

Samtang gipadayag ni Corminal nga giasikaso na sa iyang buhatan aron maisyuhan sila og occupancy permit gikan sa Office of the Building Official aron masubay sa proceso ang paggamit sa unang tulo ka andana sa CCMC.

Gipahibawo ni Corminal nga nalangan ang pagpangayo nila sa occupancy permit sanglit adunay dokumento nga ilang gipangayo apan nalangan sa pagsumiter ang contractor sa maong ospital.

Giklaro sa OIC sa DEPW nga kumpleto na ang ilang mga papelis para sa occupancy permit issuance apan wala nila kini giduso sa buhatan ni Florante Catalan, ang arkitek, samglit dili gihapon kini maisyuhan og permit kay wala ang dokumento gikan sa contractor.

Apan sa nasayran ni Corminal, naabot na ang maong papeles kagahapon, Septyembre 24, sa trabahoan. (PAC)

Trending

No stories found.

Just in

No stories found.

Branded Content

No stories found.
SunStar Publishing Inc.
www.sunstar.com.ph