ANDAM ang Criminal Investigation and Detection Group (CIDG) 7 nga mosusi sa mga vaccination card kung kini dili ba peke, apan duna silay nakita nga problema tungod kay managlahi ang dagway sa mga vaccination card sa matag local government units (LGUs).
Una nang gitinguha sa kagamhanan sa siyudad sa Sugbo nga mag base nalang sila sa vaccination card niadtong mosulod sa dakbayan kung kini gikan sa nagkalainlaing lugar sa nasud inay resulta sa RT-PCR test.
Dinhi na mitumaw ang kabalaka nga mosiaw ang pagkatap sa peke nga vaccination card niadtong dili magpabakuna.
Tungod niini, nagpatabang karon ang emergency operation center (EOC) sa kapulisan sa siyudad ug CIDG 7 nga mosuhon kining tighimo sa fake vaccination card.
Si Police Colonel Ireneo Dalogdog, ang hepe sa CIDG 7, nagkanayon nga wala pa sila makawat og pormal nga kamandoan gikan sa ilang labaw nga buhatan apan andam sila nga motabang sa kagamhanan sa siyudad ug sa tibuok rehiyon pag-ila ug pagpangita sa tighimo sa mga peke nga vaccination card.
Apan iyang giangkon nga lisud kini nga ilhon tungod kay managlahi man ang dagway sa mga card sa matag LGUs itandi sa dakbayan sa sugbo nga adunay QR code nga daling masayran kung kini tinuod ba o dili.
“Kaya itong sa vaccination card ito ang medyo mahirap i-determine kung ang vaccination nato ay fake o hindi dahil may mga kasama tayo ng mga nakakuha ng mga vaccination card dahil katatapos lang nila na vaccine pero may mga QR code yung vaccination card nila mismo,” matod ni Police Colonel Ireneo Dalogdog.
Dugang ni Dalogdog nga atol sa ilang meeting sa EOC uban ang laing LGU sa Sugbo nga kinahanglan nga butangan og QR code ang matag vaccination card aron daling masayran sa kapulisan aron magmatuod nga dili kini peke.
Mao usab kini ang basehan sa matag establisamento sa Sugbo sa ilang paghatag og incentives sa bakunado nga indibidwal.
Si Police Lieutenant Colonel Wilbert Parilla, deputy city director for operation sa Cebu City Police Office (CCPO) sa iyang bahin nitug-an nga nag-meeting na sila uban sa Cebu Chamber of Commerce and Industry CCCI diin ilang gisugyot nga ang Department pof Health (DOH) 7 nga mohimo og unified vaccination card aron ilang basehan alang sa paghatag og discount niini.
Matod ni Parilla nga ning maong tinguha dali nalang unya ang pag-ila sa tinuod og peke nga card tungod kay aduna man kini safety features nga dili makuha sa mga tighimo sa mga fake vaccination card.
“Yes very easy walay mga safety features ang atong vaccination cards, kung inyong makita siguro especially sa DOH very simple ra gyud siya, mas maayo pa ang Cebu City as of now duna nay QR code ang atoang Cebu city vaccine card,” sigun ni Parilla.
Giangkon ni Parilla nga aduna silay gi bantayan karon nga tighimog fake vax card nga target unya sa ilang operasyon aron pasakaan og kaso.
Ang masakpan nga tawo nga migamit sa fake card mag-atubang og kasong usurpation of authority.
Una nang nagtinguha ang kagamhanan sa dakbayan sa Sugbo nga daghan ang magpabakuna human mabantayi nga nagkagamay ang moadto sa mga vaccination center tungod kay mamili unsa nga bakuna ang ilang gusto.(AYB)