SUPERBALITA CEBU

Barko natikyaob sa Ormoc; 1 patay

USA ka babayeng tripolante namatay ug 15 ang nangaluwas human ang usa ka pasaheroang barko sa Danilo Lines Inc. natikyaob samtang nagmaneobra aron pagdunggo sa pantalan sa Ormoc City, Leyte mga alas 11:50 sa Biyernes sa gabii, Septiyembre 24, 2021.

Ang barko way pasahero apan dunay mga kargamento sa paglawig gikan sa Dakbayan sa Mandaue.

Ang Philippine Coast Guard (PCG) niila sa namatay nga si Raquel Alo, 33, purser sa M/V Lite Ferry 3 kinsa na-trap sulod sa barko dihang kini nitakilid ug naunlod. Si Alo taga Balilihan, Bohol.

Ang lawas ni Alo nakuha mga alas 3 sa kaadlawon sa Sabado, Septiyembre 25.

Napiit siya sa mga kargamento. Ang iyang lawas gisusi sa Scene of the Crime Operations (SOCO) sa kapulisan una pa gidala ngadto sa punerarya sa siyudad sa mga alas 5 sa buntag.

Usa sa mga survivor ang kapitan nga mo file og marine protest.

Matod ni Coast Guard Eastern Visayas commander Angel Z. Viliran nga gikan sa Mandaue Ouano Wharf ang barko nga dunay 16 ka tripulante.

“Wala po tayong mga passengers but meron lang 16 crews and mga cargo lang” matod ni Viliran.

Ang kapitan sa barko gidala pa sa safehouse kahuman na-trauma sa panghitabo.

Matod sa Coast Guard, posible nga sa dihang padulong pa lang sa Ormoc ang barko, nakasinati kini og baluron nga kadagatan sa mga isla sa Camotes nga bahin nga miresulta sa pagdagan dagan sa mga kargamento hinungdan nga nawala ang balanse sa barko.

Giklaro ni Viliran nga inisyal pa lang kini tanan ug gihuwat nila ang incident report.

Pasado alas 2 sa kadlawon, gipanguha sa Coast Guard ang kargamento gikan sa barko aron walay babag sa ilang pagpangita ni Alo.

Gimando na usab ni Viliran nga i-secure ang palibot sa posibleng oil spill.

Si Mayor Richard Gomez, nisusi sa sitwasyon ug gisiguro nga naa ang mga taga Ormoc Rescue Team ug kumpleto ang mga ekipo.

Samtang ang shipping company niingon nga sila ang motubag sa tanang galastuhan sa pagkamatay ni Alo.

Mogasto usab sila sa pagpalubong niini.

Gawas niini, makadawat gihapon ang pamilya ni Alo sa iyang insurance, last pay ug separation pay.

Sa pagkakaron, wala pa makadawat ang opisina sa incident report gikan sa kapitan sa barko.


VIEW COMMENTS
DISCLAIMER:

SunStar website welcomes friendly debate, but comments posted on this site do not necessarily reflect the views of the SunStar management and its affiliates. SunStar reserves the right to delete, reproduce or modify comments posted here without notice. Posts that are inappropriate will automatically be deleted.


Forum rules:

Do not use obscenity. Some words have been banned. Stick to the topic. Do not veer away from the discussion. Be coherent. Do not shout or use CAPITAL LETTERS!