DRUG den sa Barangay Quiot, siyudad sa Sugbo gironda sa anti drug agents sa Biyernes sa alas 9:10 sa gabii, Septiyembre 24, lima nadakpan apil na ang giingong drug den maintainer.
Ang mga operatiba sa Philippine Drug Enforcement Agency 7 milusad og buy-bust sa sitio Santo Niño human sa tulo ka mga semana nga pagpaniid.
Nadakpan nila ang upat ka mga drug user sa sulod sa balay nga gihimong suyopanan nga gipadagan ni Libertine Labating, 34.
Lakip sa nasikop silang Rafael Zapanta, 40, usa ka vendor; Clydemer Batuto, 18; Jeffrey Cabido, 32, usa ka collector; ug Jessie Sacepon, 36.
Nakuha sa mga operatiba ang 10 ka putos sa gituohang shabu nga motimbang og 10 gramos nga mo balor og P68,000 ug mga drug paraphernalia.
Matod ni Leia Alcantara, information officer sa PDEA7, nga nakadawat sila og impormasyon labot sa gipadagan nga drug den sa dapit.
Sulod sa tulo ka semana ilang gilusad ang case build up ug sa dihang nasuta nga tinuod ang nakuha nga kasayuran, gihimo dayon ang operation.
Giingong maka baligya si Labating og 15 ka gramos matag semana.
Giandam na ang kasong kalapasan sa Art II RA 9165 kun Comprehensive Dangerous Drugs Act of 2002 batok sa mga suspek. (AYB)