PADAYONG miubos ang mga bag-ong kaso sa Covid-19 sa Cagayan de Oro human kini mitala og 52 ka mga kaso, usa niini returning overseas Filipino worker (ROF), usa ang locally stranded individual (LSI), ug 50 ang mga local transmissions.
Anaa na karon sa 19,299 ang ihap sa mga kaso sa Covid-19 sa dakbayan.
Matud sa City Health Office, sa 50 ka mga bag-ong lokal nga kaso, 29 niini ang mga local index nga mga kaso, 11 ang mga local cases with link, lima ang mga lokal nga authorized persons outside residence (Apors), duha ang mga Apors with link, duha ang mga persons deprived of liberty (PDLs), ug usa ang patay.
Ang Cagayan de Oro adunay 3,515 ka mga active cases, 644 niini na-admit sa Northern Mindanao Medical Center ug uban pang mga ospital sa syudad, 2,853 ang mga outpatients, ug 18 ang mga ROFs/LSIs.
Nakatala usab og 116 ka mga Covid-positive nga mga kaso nga karon naka-recover. Anaa na karon sa 14,962 ang ihap sa mga nakarekober nga mga kaso sa dakbayan.
Ang ihap sa mga namatay sa Covid-19 sa syudad anaa na sa 822.