SA unsa nga rason, bugtong nga si Daniel De Guzman ray nasayod kon nganong wa siya moatubang sa imbitasyon sa Games and Amusement Board (GAB) kalabot sa alegasyon nga nalambigit siya sa usa ka game fixing.
Higayon na gyud unta to niya nga malimpiyohan ang iyang pangalan human siya makita sa screen shot nga nikatap sa social media nga maoy nihatag og tip sa usa ka tawo nga nisugal ug napildig dako sa duwa tali sa San Miguel Beer ug Ginebra sa PBA.
Si De Guzman kinsa player sa San Miguel Beer 3x3 team, pinaagi sa iyang agent nga si Danny Espiritu, hugot nga nihimakak sa maong alegasyon.
Aron kahatagan og patas nga husay, ang GAB nga maoy gitahasan sa pag regulate sa professional sports sa nasod gustong mokuha sa iyang habig aron pagtino kon unsa kini ka tinuod.
Gipadad-an siya og imbitasyon nga moatubang sa GAB pinaagi sa usa ka video conference niadtong Biyernes.
Apan giusikan ni De Guzman ang kahigayonan ug iya lang gibaliwala ang mando sa GAB.
Tungod sa iyang pag-snub sa imbitasyon, temporaryong gisuspenso ang iyang professional license ug di halayo ang posibilidad nga tangtangan siya niini.
“He shall not be allowed to use his license in the meantime and if proven guilty, he may lose his professional basketball players license,” matod ni GAB chairman Baham Mitra.
Sa laktod nga pagkasulti, siya ra usab ang nagbutang sa iyang kaugalingon sa apiki nga sitwasyon kay natural mawad-an man gyud siya sa iyang kapanginabuhi-an.
Dili man sab mahimo nga di moaksiyon ang GAB kalabot niini kay tingali og sundon hinuon kini sa uban.
Ang natino sa pagkakaron mao nga blacklisted na sa GAB ang fourth-round pick sa San Miguel Beer sa 2019 PBA draft.
Sa interview human siya mapili sa San Miguel sa 2019 Draft, iyang gipadayag nga wa siya magdahom nga moabot siya sa PBA.
“Sa totoo lang, hindi ko rin talaga ineexpect eh. Blessing lang talaga na dumating itong ganitong opportunity,” matod ni De Guzman nga nakutloan sa Spin.ph.
“Ibibigay ko best ko. Hindi ko pakakawalan ‘yung pagkakaton. Pangarap ko ito. Pangarap ng family ko sa akin. Every time nasa loob ako ng court na binigyan ako ng oras ni coach, ibubuhos ko talaga.”
Pero kining iyang gipanaad alang kaniya ug sa iyang pamilya, posibling mahug sa limbo-linaw, ilabi na og padayon siyang magmagahi.
Ang angay niyang buhaton karon mao ang pagpangayo og pasaylo ngadto sa buhatan sa GAB ug ablihan ang iyang kaugalingon alang sa imbestigasyon aron didto iyang malimpiyohan ang iyang reputasyon - kana kon tinuod nga wala siyay kalimbigitan sa gikatahong game fixing.
Yes, ang GAB ubos sa liderato ni Mitra, istrikto karon nga mopasunod sa mga lagda, apan sama sa uban aduna usab kini malumo nga kasingkasing ug kinsay nasayod nga mahatagan siya og second chance.
Magsilbi usab kining leksiyon dili lang ni De Guzman kon dili ngadto na usab sa uban. (jun.migallen22.@gmail.com)