NABALAKA ang Megawide Construction Corporation nga malangay ang pagsugod sa pagtrabaho sa modernisasyon sa Carbon tungod sa gipasar sa Konseho sa Dakbayan nga nagsagop sa memorandum of agreement (MOA) nga supplement sa miaging MOA nga gisudlan sa Siyudad ug sa korporasyon.
Ang MOA alang sa modernisasyon sa Carbon Public Market.
“We can adjust depending on the decision (of the Cebu City Council),” matod niya sa sagol nga English ug Cebuano sa interbyu sa Huwebes sa gabii, Septiyembre 23.
“We are willing to sit down with them because we respect the process and we respect their decision as long as its fair,” siya nidugang.
Ang Konseho sa Dakbayan nisagop sa giduso nga MOA ni Acting Mayor Michael Rama niadtong Septiyembre 1, 2021, nga nag-usab ug nag-amendar sa miaging Joint Venture Agreement (JVA) alang sa proyekto.
Lakip sa dugang mga dokumento nga kinahanglang iapil mao ang eligibility sa documents (technical ug financial) sa Megawide, feasibility study, apil na sa financial projection sa proposed project, ug kompletong unsolicited proposal nga giduso sa Megawide.
Tumong usab sa supplemental MOA ang pag-amendar ug pagpalig-on sa pipila ka bahin sa JVA preliminary conditions sama sa project phasing, mga katungod nga gihatag ngadto sa Megawide, bahinay sa kita, mga alkanse ug panagsawo sa risgo ug petsa sa pagtukod sa proyekto ug mga kondisyon sa wa pa ang petsa sa pagsugod sa pagtukod.
Si Ferrer niingon nga wa silay nakit-ang mga kakuwangan sa JVA o sa bahin sa Cebu City kay, matod niya, niagi sila sa hustong proseso, apan kon duna man, andam silang molingkod tali sa Konseho ug makigsabot sa MOA.
Hinuon, siya naglaum nga ang Siyudad motan-aw sa “total” picture sa pag-ingon nga ang Carbon redevelopment project nagsugod na ug di lang kay alang kini sa Megawide o sa vendors lang, kon di sa kinatibuk-ang Dakbayan sa Sugbo.
“Sana, they look at that because sayang yung time,” siya niingon.
Apan si Rama, hinuon, sa usa ka press conference sa Biyernes sa Septiyembre 24, niingon nga isip acting mayor sa Siyudad karon, iya nang gimandoan ang iyang mga consultant ug mo-contact sa kompaniya kay makigtagbo pa siya sa Megawide kalabot niini aron ilang matuki.
“Delay is part of progress for as long as the delay is for better tomorrow, but if the delay (is) because it is being obstructed, that matter should not (be), for me, acceptable,” siya niingon.
Matod ni Ferrer nga ang Megawide motuman sa annual graduated payment nga P50 million. Gawas niini, mao ang P25 million nga buhis.
“If you look at the records of Carbon, Carbon’s contribution to the City yung highest was in 2019 which was about P21 million. So, how is P21 million compared to siguro, minimum nato, is P75 million diba,” matod niya.
Matod niya ilang ipadayon ang pagpakigbisog alang sa redevelopment bisan sa pagtumaw sa mga isyu sa proyekto.
Matod niya nga gitakda silang mobukas pa unta sa Nobiyembre, apan niabli na sila og section alang sa ambulant vendors, Carbon Bagsakan sa M.L. Quezon Ave., nga maoy unang actual nga development nga gitugyan sa Megawide sa Huwebes, Septiyembre 23.
Si Ferrer niingon nga masaligon sila nga ilang matuman ang schedule, bisan kon siya niangkon nga ang mga isyu hayan makaapekto sa timeline sa proyekto. (WBS)