MAHIGUGMAON. Estrikta apan mapinanggaon. Ug labaw sa tanan, maanyag.
Mao kini ang paghulagway ni Carmel Loise Matus sa iyang inahan nga si Editha Matus nga bag-ohay lang nisaulog sa iyang adlaw nga natawhan.
Niadtong Septiyembre 20, gisaulog ni Editha ang kasumaran sa iyang ika-52 nga birthday sa ilang panimay sa Barangay Mambaling, siyudad sa Sugbo.
Tungod kay may pandemiya, yano nga kasaulogan ang gihimo.
Matod ni Carmel, sa miaging tuig wa sila makasaulog sa birthday sa ilang inahan tungod kay apeke sila sa panudlanan.
“This year, medyo nakaluagluag mi,” paambit ni Carmel.
“Happy birthday to the most beautiful woman in the world! We love you, Ma,” matod ni Carmel sa iyang post sa iyang Facebook account.
Duha ka espesyal nga mga gasa ang nadawat ni Editha alang sa iyang birthday. Una, ang bag-ong cellphone diin gatunga og palit si Carmel ug manghod sa iyang mama nga si Mary Jean Montalban, kinsa tua sa Germany manarbaho.
Ikaduha, ang espesyal nga birthday card nga hinimo sa iyang apo nga si Carmela Francine, anak ni Carmel.
“Happy bday, Lala. I love you,” ang mensahe sa apo alang sa iyang Lola Editha nga maoy iyang gisuwat sa birthday card.
May pakapin kini nga kiss sa aping sa iyang lola.
Paghulagway ni Carmel nga sobra kasuod ang iyang anak sa iyang inahan. May pagkaliwat si Francine sa iyang lola.
Gawas sa cellphone, gigasahan usab ni Carmel ang inahan og cake nga iya gipa-customize og tuyo sa iyang higala nga tig-bake og cake.
Paagi kini sa pagpasalamat ni Carmel ug pagbugti sa gugma sa inahan ngadto sa iyang pamilya.
Sama sa adunay daghang mga rosas ang cake nga kombinasyon sa colors nga orange ug puwa.
“Para mura sad siya naka-receive og bouquet,” sumala ni Carmel, kamaguwangan sa unom ka magsuon.
“Good health unya long life para makakita pa siya nga kaslon ko,” birthday wish ni Carmel alang sa inahan. (SCG)