GIPADAYAG ni Lapu-Lapu City Mayor Junard “Ahong” Chan nga andam siyang moluwat sa katungdanan kon ugaling adunay makapakita og ebidensya nga usa siya sa mitambong sa panagtapok sa usa ka networking company sa function room sa usa sa mga resort sa dakbayan nga giingong wala masunod ang minimum health protocol.
Adunay mga hulagway ug video nga gi-upload sa social media ang miabot sa mayor diin nagpakita nga hilabihan kadaghan sa mga tawo nga ningtambong sa kalihukan sa usa ka networking company sa milabayng semana.
Way facemasks ang kasagaran sa mga partisipante ug wala usab matuman ang physical ug social distancing.
Aduna usay mikatap nga taho nga giingong apil si Chan sa mitambong sa kalihukan, apan hugot kining gihimakak sa mayor.
“Wa koy invitation na receive. Wala sad ko didto anang mga panahona. Wa gyud ko didto pud. Siguro it’s considered as a fake news. If they can show me proof nga tua ko didto, I will resign as mayor,” matod ni Chan.
Dugang sa mayor iya nang gipaimbestigahan sa Lapu-Lapu City Police Office (LCPO) ang maong kalihukan aron masuta kon duna bay tulubagon ang resort kalabot sa panagtapok.
Gibutyag ni Chan nga human madawat ang maong mga hulagway ug video niadtong Septiyembre 23, dali unta kining giadto sa kapulisan sa pagtuo nga nagpadayon pa ang kalihukan, apan mingaw na ang tanang function room sa beach resort.
Lakip sa ipasusi sa mayor kon kanus-a nahitabo ang kalihukan ug kon dili ba dugay na ang mikatap nga hulagway ug video apan karon lang gi-upload.
Ubos sa bag-ong kamandoan nga gipakanaog ni Chan sa general community quarantine (GCQ) with heightened restrictions, dili gayud unta mahimo ang mga panagtapok sa mga venue sama sa convention, meeting ug uban pa.
Ang mga resort hinuon gitugotang makadawat og guests basta aduna silay accreditation gikan sa Department of Tourism (DOT).
“We cannot issue show cause order right away if there is no due process. Ang ato ato sang iklaro gyud kon unsa para matutokan sad gyud ni siya,” matod ni Chan.