GISUWELDOHAN na ang 207 ka mga batan-ong Oponganon nga nakapahimulos sa Government Internship Program sa Department of Labor and Employment DOLE-7.
Ang programa gipangusgan ni Kongresista Paz Radaza alang sa mga Oponganon nga nag edad og 18 ngadto sa 30-anyos nga makatrabaho sa mga buhatan sa barangay sulod sa tulo ka mga buwan.
Nasayran nga ang mga benepisyaryo gipang assign sa Brgy. Bankal, Basak, Buaya, Calawisan, Caohagan, Gun-ob, Ibo, Looc, Mactan, Pajac, Poblacion, Sabang, Subabasbas ug Tingo.
Mokabat sa P734,472 ang gahin alang sa maong proyekto.
Sa kinatibuk-an, moabot na sa liboan ka mga batan-ong Oponganon ang nakapahimulos sa programa gikan sa 2019 sukad milingkod si Radaza isip kongresista.
Mapasalamaton ang kongresista sa DOLE-7 sa gihatag niining kahigayonan sa mga batan-ong Oponganon nga makasuway og panerbisyo sa gobyerno.
“Lisod ang panahon karon. Tanan nagkinahanglan og trabaho para mabuhi. Busa kining GIP para sa mga batan-on dako ni og alibyo para nila nga maka-earn og income,” matod ni Radaza.
Si Radaza duna usay laing programa nga gipakigtamabayayungan sa Dole alang sa pagpanglimpyo sa mga barangay.
Ang beneficiaries kadtong nawagtangan og trabaho. (GCM)