TULO ka mga balay nangaugdaw ug duha ang nakan-an human miulbo ang sunog sa alas 5:16 sa Sabado sa hapon, Septiyembre 25, 2021 sa Sitio Caimito, Brgy Sambag 1, Dakbayan sa Sugbo.
Ang sunog nagsugod sa ikaduhang andana sa balay ni Allan Inso, usa ka mekaniko.
Way tawo sa taas sa balay sa mga Inso dihang miulbo ang sunog nga giisa sa 1st alarm gumikan sa kasikit sa mga balay.
Si SFO1 Riza Julve, imbestigador sa Cebu City Fire Office nibutyag nga mokabat sa P4.2 million ang danyos sa kayo nga hingpit nga napawong sa alas 5:59 sa hapon.
Si Joshua Inso nibutyag nga walay tawo sa second floor diin didto nag-ukupar iyang iyaan nga si Gloria Mancao, 70.
Sila nagtuo nga dunay nahabiling kandila kay ang iyang iyaan kanunay mangadye matag hapon.
Way kuryente ang ikaduhang andana sa balay.
Gisuwayan nilag pawong gamit ang extinguisher sa ilang silingan apan wala matabang tungod sa kapaspas pagkaylap sa kayo. Way naangol atol sa sunog. (GPL)