Daghang impormasyon sa pagpatay ni Fernandez

NAKDAWAT og daghang mga impormasyon ang Special Investigation Task Group (SITG) nga maoy nag imbestigar sa pag ambush patay kang manlalaban Rex Fernandez niadtong Agusto 26 sa Banawa, Barangay Guadalupe, Dakbayan sa Sugbo.

Kini ang giangkon ni Police Lieutenant Colonel Wilbert Parilla, deputy city director for operations sa Cebu City Police Office (CCPO).

Matod ni Parilla nga ang maong mga impormasyon gisubay na sa City Intelligence Unit ug Criminal Investigation and Detection Group (CIDG-7) aron mapaubos sa validation kon unsa ka tinuod nga sila ang responsabli sa pagpatay sa manlalaban.

Masuta usab kon unsa ang motibo nila nganong ilang gihimo ang krimen.

“Duna tay information. Dunay mga concerned citizen nga nagpadala sa atoa og information with regards or kalabotan sa pagpatay ni Attorney Rex Fernandez. And then ato na ning gihatag sa atoang CIU (City Intelligence Unit) for them to validate and then it can be took up during sa atong scheduled nga conference sa SITG Fernandez,” nagkanayon si Parilla.

Wa lang una mohatag og dugang detalye si Parilla apan iyang giklaro nga adunay mga ngalan kon kinsa ang maong mga personalidad nga ginganlan sa informant.

Ang maong mga ngalan gipasubay na usab human masuta nga naa matod pa sa laing probinsya sa Central Visayas.

Dugang niya nga nag-amping sila sa pagdawat sa gipanghatag nga mga kasayuran aron dili sila masayop sa pag tumbok, basin gilibog lang ang mga imbestigador aron mapasakaan og kaso ang dili tinuod nga nag himo sa krimen. (AYB)