BISAN sa grabeng mga pagsaway sa mga biker sa kamandoan sa pugsanay nga pagpasul-ob og facemask samtang magbiseklita, miinsister ang Cebu City Police Office (CCPO) nga ila kining ipatuman bisan kon nasayod sila sa kalisod sa pagginhawa samtang magtungas.
Gidayeg sa kapulisan ang ordinaryong mga trabahante nga mag bike to work kada adlaw kay wa moreklamo. Ang leisure bikers sama nako, maoy reklamador.
Una, di matandi ang mga trabahante ug leisure bikers. Sagad sa mga trabahante naa ra sa patag samtang sagad namo manungas sa bukid aron maka ehersisyo. Kon naa ra sa patag, way problema ang pagsul-ob og facemask. Lahi sa magtungas.
Ikaduha, open air ang karsada, diin layo kaayo ang kahigayunan nga magtakdanay. Matod sa World Health Organization “even when you’re in an area of COVID-19 transmission, masks should not be worn during vigorous physical activity because of the risk of reducing your breathing capacity.” (Bisan kon naa ka sa lugar nga dunay mga pagpanakod sa Covid-19, ang masks kinahanglan di isul-ob atol sa grabeng ehersisyo kay maglisod ka sa pagginwaha.)
Bisan ang WHO, nga maoy batid ug awtoridad sa Covid-19 nagdili sa pagpasul-ob og facemask tungod sa kalisod sa pagginhawa ug kakuyaw na hinuon sa hingtungdan, hayan atakihon sa kasingkasing o uban pang mga komplikasyon nga resulta sa pagpugos og ginhawa.
Ang WHO niingon nga kanunayon lang ang social distancing samtang mag-ehersisyo.
Samtang nakasabot mi sa katuyoan, apan nasobraan ra sab ni.
HANGYO
Ang angay bantayan mao ang panagtapok sa mga biker, sama sa dapit nga nahimutangan sa tindahan nila ni Willy Ardiente kaniadto. Kana diha tambayanan ug dugokanan sa bikers. Naa sab sa Buak nga sakop na sa Barangay Malubog. Ang medyo kusgan nang siklista molahos man sa Buak. Naa gani uban adto sa Tops kon makuwangan pa.
Kining mga dapita mahimong maoy atangan sa mga pulis ug sakop sa Probe aron mapatuman ang pagpasul-ob og facemask ug social distancing. Di kay dakpon ang bikers nga nagtungas nga wa magsul-ob og facemask.
Mohangyo ko kang Acting Mayor Michael Rama sa pag-usab sa protocol diin ang bikers tugtan nga makatangtang sa facemask samtang nagsikad, labina magtungas. Bisan ang WHO nagtambag sa di pagsul-ob og facemask sa “rigorous exercise.”
DI MAGPABADLONG
Ang mga biker usab di magpabadlong. Magtapok man hinuon nga daghan kaayo ug di pa magsul-ob og facemask, way social distancing. Mao bitaw nga nadakpan ang ubang bikers kay naabtan nga way facemask.
Karong panahuna di ordinaryo tungod sa Covid-19. Atong hinumdoman kanunay nga kon di kitay matakdan, kita ang makatakod kon di magsul-ob og facemask ug mag maintain og social distancing. Responsible man kaha ta nga mga miyembro sa katilingban, atoang sundon ang mga patakaran sa kagamhanan.