MADAYON na gyud ang pagbisita ni Sen. Manny Pacquaio dinhi sa Sugbo karong tuiga. Nia siya karong adlawa aron sementuhon ang iyang kasabutan tali sa Promdi.
Atong nadawat nga pasiunang impormasyon mao ang ipahigayon nga press conference tali sa lider sa PROMDI nga si Mimo Osmeña ug si Senador Manny Pacquiao.
Una ko nga nakadungog sa maong panagsabot-sabot human ang Manny Pacquiao for President Movement (MPPM) nakigtigom kang Lito Osmeña dihang buhi pa kini.
Samtang ang mga balita naghisgot nga modagan ang anak ni Lito nga si Mimo alang sa pagka kongresista, lahi diay ang plano sa tiguwang. Gusto diay siya nga mag senador si Mimo.
Dugay na nga walay senador ang Sugbo. Ug ang ngalan nga Osmeña sayon ra man ikampanya sa nasyonal. Hunahunaa gud. Apo ni Don Sergio, kanhi presidente Pilipinas. Anak ni Lito O nga nagmugna sa Ceboom. Dayon iyang tiyo si Serging ug JHO. Mga ig-agaw si Serge O ug Tomas O.
Gani, bisan og mga igsuon natong Muslim maka-identify. Wala may linya sa pamilyang Osmeña didto sa España o sa Uropa. Apan suod kaayo si Mayor Tomas Osmeña sa mga Muslim sa Sugbo. Ngano? Kay ilado kaayo ang Muslim hero nga si Osman.
Sa national politics, way nakaila kang Mimo. Pero tanan nakailag Osmeña.
TAGA PROBINSYA
Karon haom kaayo alang kang Sen. Manny Pacquiao nga tawgon nga Prom da Probins kun Promdi. Mahimo na kining branding niya diin maka-identify ang mga nagpuyo pa sa mga lalawigan ug kining mga promdi nga naa karon sa kaulohan.
Di gyud ko makalimot dihang nakapuyo ko sa Quezon City kadtong 1985-86. Sigi gyud ko sugsogon nga gahi kaayog dila. Klaro gyud nga promdi. Ingon niini sab si Pacman.
Haom sab ang iyang relasyon sa Promdi. Kon simbako molampos si Presidente Rodrigo Duterte, Senador Bong Go, ug DOE Secretary Alfonso Cusi nga ang ilang paksyon sa PDP-Laban ang tuohan sa Commission on Elections (Comelec), ang Promdi maoy mahimong main political party sa Pambansang Kamao.
Masayang lang ang dakong drama nga maghimog paksyon sa PDP-Laban kini silang Duterte aron mapapas sa mapa sa pulitika si Pacquiao.
Kon buot hunahunaon man gud, dakong labad sa ulo sa mga Duterte kining pagdagan ni Sen. Pacquiao. Matunga man gud ang mga boto nga gikan sa Visayas ug Mindanao tali sa senador ug sa kandidato ni Digong nga mao ang iyang anak nga si Davao City Mayor Inday Sara Duterte-Carpio.
Dinhi sa Sugbo, di na maglabad ang senador kon si kinsa ang iyang kasaligang organisasyon. Mao na kini ang Promdi. Sayod man kita nga sayon ra kaayo nga makapatindog og organisasyon ang mga Osmeña dinhi sa Sugbo.
KAALYADO
Isip usa ka political observer, akong bantayan karong pagbisita ni Pacquiao sa Sugbo kon si kinsa ang iyang mga pakigkitaan nga mga Sugboanong lider.
Importante kini aron atong maaninaw ang political landscape unya inig padung na sa pagsang-at sa certificate of candidacy.
Nakahibawo na man kita nga si Inday Sara naay mga kaalyado na sa Sugbo sama ni Gob. Gwen Garcia ug grupo sa Barug nilang Acting Mayor Mike Rama dinhi sa Syudad sa Sugbo.
Di lang gyud hinuon ko maniguro kon asa padung kini si Gob. Garcia kay basi sa mga huhungihong, nag-una na si Kong. PJ Garcia sa kampo ni Manila Mayor Isko Moreno. (DM nako sa @anol_cebu)