Way plano si Land Transportation Office (LTO) Regional Director Victor Caindec sa pagdagan sa pagka mayor sa Dakbayan sa Sugbo 2022 elections, apan wa usab niya sirad-i ang posibilidad.
Giluwatan kini ni Caindec tungod sa mga social media post sa mga hulagway sa tarpaulin nga gibitay sa skywalk sa dan V.
Rama, Dakbayan sa Sugbo nga naa ang iyang panagway nga nagpahibawo sa iyang pagdagan sa sunog tuig nga piniliay.
Wa usab siya masayod kinsa ang nagbutang sa tarpaulin nga dunay gisuwat nga 'Bungoton 2022.'
Sa interbyu sa Superbalita Cebu, si Caindec niingon nga wa kini sa iyang huna-huna tungod kay daghan pa kaayo sila og mga gimbuhaton sa Department of Transportation (DOTr).
Usa sa ilang gikampanya karon mao ang road safety, labina sa kabukiran diin dunay daghang mga tawo, labina mga batan-on nga way lisensya ug way rehistro ang motorsiklo.
Bag-ohay lang siya nga nakigtagbo sa mga barangay kapitan sa north district sa Dakbayan sa Sugbo aron mahisgutan ang
kabahin sa road safety.
Matod niya nga dunay mga barangay official nga wa manunga kay nagtuo nga siya namulitika.
“So far sa discussion, daghan pang mga trabaho nga wa pa mahuman,” nga gipatrabaho ni Duterte kanila nga kinahanglang
tiwason ning nahabiling pipila ka mga buwan.
Apan matod ni Caindec nga kon si Duterte ang momando kaniya sa pagdagan, andam siyang motuman.
“Kon moingon ang Presidente nga padaganon ko, andam kon motuman kay I am a presidential appointee,” dugang niya.
Siya nagtuo nga iyang mga higala ug supporter ang nagbutang sa tarpaulin.
Niangkon si Caindec nga duna siyay mga higalang negusyante nga nag-aghat kaniya sa pagdagan, apan iya kining
gibalibaran./REV