NAGSUGOD man sa pag-agas sa mga luha tungod sa di maayong kasinatian atol sa ilang kasal, apan nitapos sa kapasayloan ug kalipay human nag awas-awas ang mga grasya sa magtiayon nga Arniel ug Cherry Pie Satingasin.
Pinaagi sa pagsanong sa imbitasyon sa sibyaanang DYHP ug 93.9 i-FM alang sa usa ka simple apan elegante nga reception,nahinayon na ang ilang selebrasyon nga napalpak atol sa adlaw sa kasal niadtong Septiyembre 22.
Isip remake sa di maayong hitabo sa magtiayon, nahitabo ang reception sa lobby sa DYHP RMN Cebu station sa Septiyembre 25, 2021 nga ingon sa nahitabo human gyud sa kasal.
Usa lang ka simpleng salo-salo ang gi-expect sa magtiayon, apan nasurpresa sila sa ilang pag-abot sa estasyon tungod kay anaa na ang ilang mga pamilya.
Gitambungan usab kini sa mga opisyal sa lungsod sa Minglanilla nga sila si Atty. Rajiv Enad ug Atty. Boyet Velez.
Aron mahimong susama sa tinuod nga programa sa reception sa kasal, gipasul-ob usab og gown ang bride ug suit usab alang sa groom, maid of honor ug inahan sa bride.
Gihimo usab ang tradisyonal nga cake slicing, wine toasting, first dance isip magtiayon, money dance ug salo-salu kauban
ang pamilya niini.
Wa mahinayon ang wedding reception niadtong Septiyembre 22, 2021 human nga giingong na-scam ang magtiayon sa ilang wedding coordinator nga si Nasser Fuentes nga kasamtangan na nga gi-detain sa Police station 3 sa Mandaue City Police Office tungod sa kasong estafa nga nasang-at niadtong 2013.
NAGPASAYLO
Sa wala pa ang adlaw sa reception, gipadayag sa magtiayong Satingasin nga bisan pa sa gihimo ni Fuentes
ila na kining gipasaylo.
“Dili lang pataman og pasakit pod kay humana man, nangagi na labi na maglagot ta, pero napriso naman siya. So, sakto na
siguro...”
Matod ni Cherry Pie nga dili usab nila gusto nga mohukom sa coordinator sanglit wala usab sila mahibaw kon duna ba kini’y
seryusong giagian.
Apan atol sa reception, gipaabot ni Arniel sa publiko nga kon mahimo husto na ug angay na nga mag move on sa
mga di maayong nahitabo alang usab sa kalinaw sa tanan.
“Naa lang unta mi ihangyo sa mga viewer nga unta i-kuan na ni nga problema aron maka move-on na tang tanan kay labi na sa amoa pod karon nga stress sad kaayo ba kay wa pa gyud mi kaagi og ingon ani ba sukad. Unya nahitabo pa gyud sa ingon ani nga nahitabo. So, daghang salamat sa tanan,”matod ni Arniel.
“Kon mopaabot mo sa inyong pahalipay, willing ra mi modawat pero mga interview dili na lang mi kay wa na gyud mi tulog pila na ka adlaw, way kaon kay wala na’y lami i-kaon,”dugang usab ni Cherry Pie.
Nagpasalamat hinuon sila sa tibuok nga suporta sa mga Sugboanon bisan pa sa di makalimtan nga panghitabo sa ilang pagsulod sa ganghaan sa kaminyuon.
Nalakip sa mga misuporta sa selebrasyon ang ilado nga wedding ug event coordinator nga si Carlo Abaquita, ingon man si Geof Lagria, kauban usab ang Dj Gabsquad, Jam Durado nga maoy make-up artist, Red Dumaguil ug Ralph Leyno alang sa acoustic band ug sound system ug uban pa nga mga sponsor sama sa Belly Boy, Lounet’s Catering, Ade’s Fashion House, Immuniplus, Uratex Foam, KB Cee Plus,Wild Streetfood Cebu, Star Image Photo Studio ug Palm Grass Hotel.
Buot sa magtiayon nga kapanaminan usab sa publiko ang ilang estorya nga bisan pa sa di maayong pagsugod, aduna gihapo’y paglaom ug lugar sa pagpasaylo aron makab-ot ang kalinaw ug panalangin gikan sa kahitas-an.
Sa mubo nga pagkasulti adunay “happy ending”.(ANV)