TULO ka adlaw na lang ang nagpabilin aron mo-file na sa ilang certificate of candidacy ang mga kandidato gikan sa pinakaubos hangtud sa pinakataas nga posisyon.
Diri ta magpukos sa pinakataas, tulo na ka kandidato sa pagka- presidente ang nagdeklara. Una, si Panfilo Lacson, Isko Moreno ug Manny Pacquiao. Pero si Manny Pacquiao lang walay miboluntaryo nga mag-bise presidente ug kuwestiyonable pa ang iyang political party sa kon kinsay ideklara sa Commission on Election (Comelec) nga legal ug lihitimong magdala sa Partido Demokratiko Pilipino-Lakas ng Bayan (PDP-Laban) ug mahibaw-an nato na una magsugod sa pag-file sa ilang certificate of candidacy ang mga kandidato.
Adunay pipila ka mga dapit sa Mindanao nga atong gisusi sama pananglit sa Dipolog, Zamboanga del Norte, General Santos City ug South Cotabato kon unsay dagan sa ilang gi-organisa nga SARA-RUN-SARA, kon wala ba sila madismaya sa statement ni Mayor Inday Sara nga dili na siya modagan sa pagka-presidente kon modayon sa pagdagan ang iyang amahan sa pagka-bise presidente?
Sa atong nahibaw-an, wala sila madismaya kay hugot ang ilang paglaum nga modagan gyud sa pagka-presidente si Mayor Inday Sara. Sa tulo ka kandidato nga mideklara sa pagka-presidente, si Mayor Inday Sara lang ang organisado na since 2019 pa Luzon, Visayas and Mindanao.
Ang pangutana karon, SARA for PRESIDENT o CITY MAYOR na lang? Ang bola karon anaa sa amahan, PRRD, tungod kay siya lang ang dakong babag kang Mayor Inday Sara nga dili mahinayon pagdagan sa pagka-presidente. Pero daghan ang naglaum nga mahinayon si Mayor Inday Sara sa pagdagan sa pagka-presidente tungod kay kitang tanan nasayud na sa taktika sa pamolitika sa mga Duterte kaniadto pa.
Lima ang kandidato sa pagka-presidente sa 2016 Presidential Election nga mao sila si Mar Roxas, Grace Poe, Jejomar Binay, Miriam Defensor Santiago ug Rodrigo Roa Duterte.
Karon kon walay madugang, lima gihapon nga sila si Lacson, Moreno, Pacquiao, Leni Robredo ug ang atong garbo Mayor Inday Sara. Gusto nato nga kuptan gihapon sa taga Davao ang pagka-presidente tungod kay dili ikalimod nga daghang kalamboan nga nahimo ang amahan pero dili dinhi sa ato, kon dili sa taga Luzon, Visayas ug ubang parte dinhi sa Mindanao. Apan ang Davao City ug tibuok Davao Region wala gyud intawon.
Dinhi sa Davao wala kita'y dakong handumanan nga kausaban sa pagka-presidente ni PRRD. Manghinaut kita nga bawion kini sa anak nga kuwalipikado sa maong posisyon sa pagka-presidente.
Kon madala og ampo, hala mag-ampo ta nga mo-withdraw si Digong sa pagdagan sa pagka-bise presidente ug ang atong mayor mao ang kandidato sa pagka-presidente aron siya ang magdala sa dakong kausaban sa dagway sa atong minahal nga dakbayan sa Davao sulod sa laing unom ka tuig isip pangulo na.
***
Paminawa ang atong programa nga KONTRA BALANSE sa DXAL 90.1 Radyo ng Masa Digos City, Davao del Sur, matag alas 7 hangtud sa alas 8 sa buntag, Lunes hangtud sa Sabado. Mabati sad ang KONTRA BALANSE sa 88.1 Malungon, 88.1 Alabel, 88.1 Maasim ug 88.1 Maitom, Sarangani Province.