MOKABAT sa 51 ka mga palahubog ang gipangdakop sa Sta. Ana Police Station human sila nasikpaw sa usa ka sikat nga tagayanan sa Narra Street, Barangay 30-B, Poblacion, Davao City.
Sa impormasyon gikan sa Sta. Ana Police Station, gironda sa kapulisan ang dapit human sila makadawat og report gikan sa Task Force Davao team nga gipangunahan ni Staff Sargent Jimmy Alcojeres samtang nagpahigayon sila og foot patrol. Nasiplatan nila nga dunay daghang mga nag-inom sa dapit bisan og gidili kini subay sa pagpatuman sa mga health protocols batok Covid-19.
Nasayran nga sekreto, suma pa, ang maong imnanan ug niadto pa nagapasulod og mga kustomer nga magtagay bisan pa sa gipatuman nga community quarantine sa dakbayan.
Sa pagpanguna sa hepe sa Sta. Ana police, Police Major Benkalin Baluan, malampusong nasikop ang 51 ka mga managayay alas 9:30 sa gabii niadtong Biyernes, Septiyembre 24, 2021.
Sa 51 nga nasikop, 36 ang nasakpang nag-inom og ilimnong makahubog samtang 15 ang nasikop tungod sa wa pagtuman sa social distancing.
Sumala sa Davao City Police nga bawal ang social gathering, panagtapok, ug tagay sa ilimnong makahubog tungod kay anaa pa ang Siyudad sa Davao ubos sa general community quarantine with heightened restrictions.
Nakatakdang pangkasohan sa korte ang mga nahisgutan Lunes.