2 nagpalusot og mga armas pasakaa'g kaso

NAKATAKDANG ihatud sa City Prosecutor's Office (CPO) Lunes, Septiyembre 27, 2021, ang duha ka mga lalaki nga gikan sa Cagayan de Oro City kinsa nagdala'g daghang armas ug nakuhaan og gituohang shabu sa checkpoint sa Task Force (TF) Davao sa Barangay Lacson Calinan Davao City alas 10 sa buntag niadtong Sabado, Septiyembre 25.

Sa report sa Calinan police, ang duha gipang-ila ni Police Major Jake Goles nga sila Michael John Lantoria, 40, taga Cagayan de Oro City, ug Sebastian Quiblat, 61, taga Misamis Oriental.

Nasayran nga sakay ang mga nahisgutan sa usa ka Mitsubishi Strada pickup pasulod sa Davao City ug padung unta sa General Santos City.

Dihang gihiling sa mga sakop sa TF-Davao ang sud sa sakyanan misugat sa ilang panan-aw ang 42 ka buok nga 9-millimeter (mm) pistol, 18 ka gauge shotguns ug mga nagkalain-laing mga buhing bala.

Gawas sa mga armas, nakuha sab sa posisyon sa duruha ang lima ka pakite sa gituohang shabu nga dunay gibug-aton nga 3 gramos nga mikantidad sa P48,000; laing usa ka 9mm pistol, usa sab ka 380 pistol; usa ka magazine ug pito pa ka mga bala.

Sumala sa TF-Davao, wala nakapakita og mga dokumento ang mga nahisgutan butang nga gi-hold sila ug gipangrekisa ang sud sa sakyanan.

Sigon ni Task Force Davao Commander Colonel Darren Comia nga bunga kini sa ilang gihingusgan nga hugot nga pagrekisa sa mga sakyanan nga mosulod sa siyudad.

"This is a testament of the vigilance and alertness of the TFD personnel in ensuring the safety and security of Davao City. With this catch, indeed, the Culture of Security is very much alive in Davao City," ingon ni Comia.

Gibutyag sab sa 10th Infantry "Agila" Division nga kini ang resulta sa ilang tinguha nga makab-ot ang kahapsay ug kalinaw, di lamang sa Davao City kon di sa kinatibuk-ang Rehiyon Onse.

"This big catch in Davao City is a clear manifestation of 10th Infantry Division's commitment to help provide lasting peace and order in the region. Indeed, our troops are committed and skillful in the performance of their duties. And for the peace-spoilers, you have no room in the area of 10ID," sulti ni 10th Infantry Agila Division Commander Major General Ernesto Torres Jr. (Jeepy P. Compio)