Nihatag na og pagtugot ang Philippine Basketball Association (PBA) kang NLEX Road Warriors guard Kiefer Ravena nga makaduwa sa Japan Professional Basketball League (B.League).
Mao kini ang gipahibalo ni commissioner Willie Marcial sa interbyu sa GMA News Online.
Ning bag-uhay lang, nagkanayon si Road Warriors head coach Yeng Guiao nga nangandam ang team aron ipabarog ang ilang katungod kang Ravena, kinsa milarga niadtong Agusto 25, 2021 paingon Japan aron hikayon ang iyang pagduwa sa B.League.
Hinuon, nagkasabot na ang PBA ug ang NLEX nga tugtan na lang si Ravena nga moduwa sa B.League.
Nakadesisyon si Ravena nga moduwa sa Japan gumikan kay mas dako ang suweldo nga iyang madawat kumpara sa PBA.
Bisan wala si Ravena, ang Road Warriors nakasulod gihapon sa quarter-finals sa kasamtangang nagpadayon nga Philippine Cup sa semi-bubble sa Bacolor, Pampanga.
Si Ravena usa lang sa walo ka mga Pinoy nga mopakita’g aksyon sa B.League nga sugdan sa hinapos nga bahin sa buwan sa Septiyembre, 2021.
Kagahapon, Septiyembre 26, 2021, pormal nang gidawat si Ravena sa iyang team sa B.League nga mao ang Shiga Lakestars. (ESL)