Tulo ka tawo ang gipangita pa atol ning pagsuwat human gianod sa kusog nga bul-og sa baha samtang nangaligo sa Tinubdan Falls sa Barangay Tabili, lungsod sa Catmon, ala 1:01 sa hapon sa Dominggo, Septiyembre 6.
Ang wala pa igkita mao si Jacel Alastra, 32, minyo, trabahante sa Mactan Economic Zone (MEZ) ug taga Barangay Kalangahan, lungsod sa Tuburan. Lakip nga missing mao ang iyang anak nga si Princess, 7, ug pag-umangkon nga si Kent Junde Monterola, 17.
Si Police Corporal Gemar Arigo, imbestigador sa Catmon Police Station nga nahinabi sa Superbalita Cebu, nagkanayon nga ang mga biktima uban sa dili mominos 17 ka kabanay nga nangaligo sa falls.
Ang maong falls nailang tourist spot sa dapit ug gibanabana nga 15 ka kilometros ang gilay-on gikan sa sentro sa Catmon.
Sumala ni Arigo, ang grupo niabang og cottages ug 17 tanan ang narehistro sa logbook.
Dugang sa pulis nga maayo ang panahon sa sayo pa busa nalingaw sila sa pagpangaligo sa ubos sa falls apan wala damha, kalit nga nibuswak ang kusog ug dakong bul-og sa tubig sa falls.
Nangabanlas ang mga biktima apan ang ubang kabanay nakalingkawas human nangasangit sa dagkong bato ug dunay nakakupot sa kahoy sa daplin sa sapa ug nakasaka sa pangpang.
“Naglisod sila kalit kaayo ang tubig sa baha, uwan sa bukid didto, pero sa ilang nahimutangan walay uwan, gibanlas sila diretso,” asoy ni Arigo.
Gidali sa pagluwas ang nangasangit sa bato ug nakakapyot sa kahoy sa daplin apan si Jacel uban iyang anak ug pag-umangkon, wala igkita atol ning pagsuwat.
Gibutyag ni Police Corporal Arigo, nga lisod kaayo ang area dili masungasong ang kusog nga tubig sa baha.
Delikado human nagsige pa sa pagbaha hinungdan nga naabtan sila og gabii sa dapit ug gihunong una ang operasyon tungod sa kangitngit na sa palibot. Hinuon, mobalik kini karon, Septiyembre 27.