Kakugi ug determinasyon, kun grit, mao ang nakahatag og dakong tabang alang kang Jude Philip Pozon Cebrecus, 25, sa iyang dakong kalampusan sa bag-uhay lang nahuman nga 2021 Physician Licensure Exam (PLE).
Pinaagi sa iyang rating nga 87.83 percent, nakuha ni Cebrecus, usa ka alumnus sa Cebu Institute of Medicine (CIM), ang pinakadako nga rating sa maong exam kauban ang usa pud sa nag-top 1 nga si Maria Inez Benedicto nga nahuman og medisina sa West Visayas State University-La Paz.
“The feeling still hasn’t fully sunk in yet. I really wasn’t expecting to top the board exams since we only had a very limited time alloted for intensive review and we had physical duties in the hospital early on in the year, so I wasn’t able to really review then,” sigon ni Cebrecus, kinsa niangkon nga nakurat g’yod tuod siya sa resulta sa eksaminasyon nga iyang gikuha.
Gawas ni Cebrecus, duna pay usa ka Cebuano topnotcher ang PLE karong tuiga. Siya si Kirk Louie Umali Amandoron, graduate usab sa CIM, kinsa nag-top 7 tungod sa iyang rate nga 86.83 percent.
Giangkon ni Cebrecus nga lisod gyud alang kaniya ang pagpokus sa pagrebyu tungod sa mga kahingawa ug kahadlok nga dala sa Covid-19 pandemic.
Matod niya, sayud siya sa grabeng kalisod nga naagian sa mga Pilipino sa milabayng duha katuig tungod aning pandemic nga gisagubang karon, samutan sa mga nagkadaiyang nanggawas nga variant sa coronavirus ug sa mga gipangkapoy na nga frontliners.
Sigon niya lisod tuod karong panahona nga mamahimo nga usa ka doktor ug kinahanglan gyud nga adunay paghigugma ug pasyon alang sa medisina ang usa ka tawo sa dili pa siya mohukom nga magsugod sa pag-eskwela niini.
“So much is expected of us with not much given in return, but our profession has always been one of service. The passion and love for medicine is crucial before embarking on this path that lies ahead of us especially at this time of pandemic,” matod niya.
Ang PLE gilangkuban og 12 ka subjects nga kinahanglan mahuman og upat ka adlaw sulod sa duha ka semana.
Gidugang ni Cebrecus dinhi palang medyo na-intimidate na siya tungod kay lapad kaayo ang sakop sa medisina ug di gyud matag-an kon unsa nga mga hisgutan ang manggawas sa exam.
Mapasalamaton si Cebrecus sa Ginuo ug sa iyang pamilya nga mga doktor usab, kinsa nagsuporta ug nag-ampo alang kaniya.
Sa pagkakaron, nagplano siya nga mag-residency ug matod niya, naglaom siya nga masulod siya sa iyang gusto nga programa aron mas mahimo pang mas maayo nga doktor sa iyang mga umaabot nga pasyente. (WBS)