Gipahibawo ni Presidente Rodrigo Duterte niadtong Miyerkules sa gabii, Septiyembre 22, nga giaprobahan niya ang rekomendasyon sa technical advisory group (TAG) sa Department of Health ug sa medical experts nga di na himuong rekisito ang pagsul-ob og face shields sa gawas. “No more face shields outdoors,” matod sa pangulo.
Atong klaruhon nga wa nay face shields kon naa ka sa gawas. Apan gikinahangkan gihapon ang face shields sa mga lugar nga gitawag og “3Cs” - closed, crowded, close contact. Sirado, daghang tawo, magsikit. Sa malls ug mga tindahan, di ka pasudlon kon di ka magsul-ob og face shield. Kon wa kay dala nga face shield, dunay baligya sa kilid sa security guard. Apan kon tua na sa sud, bitbiton na lang ang face shields o himuong headband.
* * *
Gimando sa gobyerno ang pagsul-ob og face shields sa tanang higayon sa mga pangpublikong lugar niadtong Disyembre sa miaging tuig. Apan, daghang mireklamo tungod kay dugang kini nga gasto alang sa katawhan nga naglisod tungod sa pandemiya. Gidebatehan sab kon unsa ka epektibo ang face shields isip proteksyon sa usa ka tawo aron di siya matakdan sa Covid-19. Ang maong virus madala sa hangin pinaagi sa respiratory aerosol o mga ginagmay nga pinisik gikan sa baba ug ilong. Daghang nanawagan nga ilibkas sa presidente ang mando sa pagsul-ob og face shields tungod sa kadudahan nga proteksyon niini batok sa Covid-19. Usa sa nanawagan mao si House Speaker Lord Allan Velasco.
* * *
Sa iyang suwat ngadto sa pangulo nga pinetsahan og Septiyembre 20, si Velasco niingon nga sa mga pagtuon nga gihimo dinhi sa Pilipinas ug sa gawas sa nasod, way medical proof nga nagpakita nga epektibo ang face shields batok sa pagtakod sa Covid-19. Matod ni Velasco, ang pagtuon nga gihimo sa doctor-researchers sa Wayne State University School of Medicine, nagpakita nga gamay rag kalainan ang magsul-ob og face mask ug ang dungan nga pagsul-ob og face mask ug face shield. Samtang ang pagduki-duki sa Philippine Society for Microbiology and Infectious Diseases nagpakita nga ang face shield di maghatag og dugang proteksyon batok sa respiratory aerosol nga nagdala sa Covid-19.