Giawhag sa Traffic Enforcement Agency of Mandaue (Team) ang mga operator ug drivers sa mga public utility vehicle (PUVs) nga mo-renew sa ilang special permit to operate (SPO) sa dili pa sila magsugod sa panakop karong Oktubre 1.
Kini human ang Land Transportation Franchising and Regulatory Board (LTFRB) nagpagawas og usa ka memorandum nga ang tanan nga mga operator sa PUV nga nakakuha og QR Code sa ilang opisina, kinahanglan nga bag-ohon ang ilang special permit to operate sa dili pa ang Septiyembre 15, 2021.
Miingon si Edwin Jumao-as, pangulo sa Team nga ila unang hatagan og higayon nga mahibawo ang mga operator ug drivers sa dili pa sila manakop hinungdan nga ipakatap kini nila karong Oktubre 1, 2021.
Gipahibawo una nilang Jumao-as ang tanang mga operator, drivers lakip na ang terminals sa mga PUVs kabahin niining memorandum sa LTFRB.
Gawas sa SPO, sigon ni Jumao-as nga kinahanglan usab nila nga mokuha og Team Clearance sa ilang buhatan.
Sa pagkuha sa maong mga rekisitos, kinahanglan una nga bayaran sa mga operator o drayber ang tanan niining unsettled violations, sigon ni Jumao-as.
Ang dili makakuha sa SPO mahulog nga colorum ang pagpadagan.
Tungod niini, sa panahon nga madakpan ang bisan kinsa nga drayber nga walay SPO ug Team Clearance gawas sa citation, ipa-impound sab ang sakyanan, dugang ni Jumao-as.
Ang citation adunay P1,000 nga multa, matag violation.
Aron malukat ang na-impound nga sakyanan, kinahanglan aduna nay SPO ug Team Clearance ang drayber o operator ug nakabayad na sab kini sa mga multa, sumala ni Jumao-as.
Gidugang niya kauban ang opisina sa Mandaue City Police Traffic Division sa ilang pagpatuman sa maong memorandum karong Oktubre 1, 2021. (KFD)