Moabot sa 171 ka mga pamilya nga naigo sa sunog sa Sitio Labsalex, Barangay Labangon, Dakbayan sa Sugbo ang gihatagan og hinabang ni Association of Barangay Councils (ABC) President Kapitan Franklyn Ong niadtong Biyernes, Septiyembre 24.
Niulbo ang sunog sa maong lugar niadtong Septiyembre 20 sa kaadlawon, diin 80 ka panimalay ang naapektohan.
“Kasabot ko sa kalisod karong panahon sa pandemiya. Daghang walay trabaho, daghang gigutom unya maabot pa gayud ning masunogan ta," asoy ni Ong samtang nakig-atubang sa mga biktima sa sunog.
"Di gayud ni lalim. Ang ako lang kay ayaw kamo kawad-i og paglaom. Importante walay nakalas nga kinabuhi,” dason niya.
Nanghatag si Ong og bugas, canned goods, instant noodles, gatas, yogurt, face masks, vitamins, ug t-shirt nga gikan sa personal nga panudlanan sa maong opisyal.
Gipahinumdoman sab sa presidente sa ABC ang mga residente sa Sitio Labsalex nga dili mokompiyansa ning panahona kay anaa gihapon ang hulga sa Covid-19.
“Mag-amping lang gayud ta hilabi na karon nga nagpadayon pa ang kagaw nga Covid-19. Di lang gayud ta mokompiyansa gihapon kay di gayud lalim, masunogan ta ug matakdan ta. Dako na og problema,” matod ni Ong.
Nipadayag og pasalamat ang kapitan sa Barangay Labangon nga si Vic Buendia sa personal nga hinabang ug suporta nga gihatag sa presidente sa ABC.
Human sa pagpanghatag sa hinabang, gilibot ni Ong ang area diin nahitabo ang sunog, diin iyang gikumusta ang mga molupyo sa dapit. (PR)