SUPERBALITA CEBU

Bag-ong kasal mipasaylo sa scammer; radio network mi-sponsor og post wedding party

Nagsugod sa pag-agas sa mga luha tungod sa di maayong kasinatian atol sa ilang kasal, apan nitapos sa kapasayloan ug kalipay human nag-awas-awas ang mga grasya sa magtiayon nga Arniel ug Cherry Pie Satingasin.

Pinaagi sa pagsanong sa imbitasyon sa sibyaanang DYHP ug 93.9 i-FM alang sa usa ka simple apan elegante nga reception, nahinayon na ang ilang selebrasyon nga napalpak atol sa adlaw sa kasal niadtong Septiyembre 22.

Isip remake sa di maayong hitabo sa magtiayon, nahitabo ang reception sa lobby sa dyHP RMN Cebu station sa Septiyembre 25, 2021.

Usa lang ka simpleng salo-salo ang gilaoman sa magtiayon, apan nasurprisa sila sa ilang pag-abot sa estasyon tungod kay anaa na ang ilang mga pamilya.

Gitambungan usab kini sa mga opisyal sa lungsod sa Minglanilla nga sila si Atty. Rajiv Enad ug Atty. Boyet Velez.

Aron mahimong susama sa tinuod nga programa sa reception sa kasal, gipasul-ob usab og gown ang bride ug suit usab alang sa groom, maid of honor ug inahan sa bride.

Gihimo usab ang tradisyonal nga cake slicing, wine toasting, first dance isip magtiayon, money dance ug salo-salo kauban ang pamilya niini.

Wa mahinayon ang wedding reception niadtong Septiyembre 22, 2021 human nga giingong na-scam ang magtiayon sa ilang wedding coordinator nga si Nasser Fuentes nga kasamtangan na nga gi-detain sa Police station 3, Basak, Mandaue City tungod sa kasong estafa nga nasang-at niadtong 2013.

Sa wala pa ang adlaw sa reception sa Septiyembre 24, gipadayag sa magtiayong Satingasin nga bisan pa sa gihimo ni Fuentes, ila na kining gipasaylo.

“Dili lang pataman og pasakit pud kay humana man, nangagi na labi na maglagot ta, pero napriso naman siya. So, sakto na siguro...” matod ni Cherry Pie.

Dason niya nga dili usab nila gusto nga mohukom sa coordinator sanglit wala usab sila mahibawo kon duna ba kini’y seryusong giagian.

Apan atol sa nahitabong reception, gipaabot ni Arniel sa publiko nga kon mahimo husto na ug angay na nga mag-move on sa mga di maayong nahitabo alang usab sa kalinaw sa tanan.

“Naa lang unta mi ihangyo sa mga viewer nga unta ikuan na ni nga problema aron maka move-on na tang tanan kay labi na sa amoa pud karon nga stress sad kaayo ba kay wa pa gyud mi kaagi og ingon ani ba sukad. Unya nahitabo pa gyud sa ingon ani nga nahitabo. So, daghang salamat sa tanan,” matod ni Arniel sa Septiyembre 25.

“Kon mopaabot mo sa inyong pahalipay, willing ra mi modawat pero mga interview dili na lang mi kay wa na gyud mi tulog pila na ka adlaw. Way kaon kay wala na’y lami ikaon,” dugang ni Cherry Pie.

Nagpasalamat hinuon sila sa tibuok nga suporta sa mga Sugboanon bisan pa sa di makalimtan nga panghitabo sa ilang pagsulod sa ganghaan sa kaminyuon.

Lakip sa mga misuporta sa selebrasyon, ang ilado nga wedding ug event coordinator nga si Carlo Abaquita, ingon man si Geof Lagria, kauban usab ang DJ Gabsquad, Jam Durado nga maoy make-up artist, Red Dumaguil ug Ralph Leyno alang sa acoustic band ug sound system ug uban pa nga mga sponsor sama sa Belly Boy, Lounet’s Catering, Ade’s Fashion House, Immuniplus, Uratex Foam, KB Cee Plus,Wild Streetfood Cebu, Star Image Photo Studio ug Palm Grass Hotel.

Buot sa magtiayon nga kapanaminan usab sa publiko ang ilang storya nga bisan pa sa di maayong pagsugod, aduna gihapo’y paglaom ug lugar sa pagpasaylo aron makab-ot ang kalinaw ug panalangin gikan sa kahitas-an.

Sa mubo nga pagkasulti, sumala sa magtiayon, adunay 'happy ending' human sa kagul-anan human sa seremonyas sa kasal. (ANV)


VIEW COMMENTS
DISCLAIMER:

SunStar website welcomes friendly debate, but comments posted on this site do not necessarily reflect the views of the SunStar management and its affiliates. SunStar reserves the right to delete, reproduce or modify comments posted here without notice. Posts that are inappropriate will automatically be deleted.


Forum rules:

Do not use obscenity. Some words have been banned. Stick to the topic. Do not veer away from the discussion. Be coherent. Do not shout or use CAPITAL LETTERS!