Dili mominos 11 ka panimalay ang hingpit nangaugdaw sa sunog nga niigo sa Sitio Panagdait, Barangay Kasambagan, Siyudad sa Sugbo kagahapon sa udto, Septiyembre 27.
Ang danyos gibanabana sa kabomberohan nga mobalor og P1.8 milyunes.
Nadawat sa fire department sa dakbayan ang alarma sa alas 11:00 sa udto ug giisa nila sa 1st alarm sa pagka alas 11:06 human masuta nga residential ang nasunog. Pagka alas 11:09 sa buntag, giisa sa 2nd alarm.
Sa pagka alas 11:31 sa buntag nakontrolar na ang kayo ug pagka alas 11:43 sa buntag, gideklarar nga kabomberohan nga hingpit nang napawong kini.
Sa pagkutlo ning taho, gisubay pa sa mga tinugyanan sa Cebu City Fire Department (CCFD kon unsay hinungdan sa pag-ulbo sa sunog nga nagsugod sa panimalay sa magtiayong Armel ug Arlene Sacil nga ginama sa light materials.
Matod pa, ang kayo dali nga mikatap sa kasilinganan.
Ang anak sa magtayon nga si Intoy nagkanayon nga nanugway siya og kanding sa luyo sa ilang balay apan dihang mibalik, dako na kaayo ang kayo.
Gihimakak niya nga ang biniyaan nga linung-ag ang hinungdan sa maong sunog.
“Nanugway ra man kog kanding diri pag balik nako kusog na kaayo ang kayo, ambot nganong nasunog na.” matod ni Intoy Sacil.
Walay natala nga naangol sa sunog sanglit daling nakagawas ang mga molupyo. (AYB)