SECTIONS
Superbalita Cebu
Wednesday, October 20, 2021
SUPERBALITA CEBU

Espinoza: Di na ta mokumpiyansa

Nagpakabana

PAHIMANGNO alang sa mga motorista padulong sa norte sa Cebu, ingon man ang gikan sa norte nga moadto sa dakbayan sa Sugbo, nga diha sa Compostela, gisirad-an ang duha ka lane sa highway sa tuo nga bahin padulong sa norte. Ang problema kay walay husto nga traffic direction ug safety sign nga gi-istalar sa dalan. Ang notisya igo ra nagpasabut nga dunay gitrabaho sa highway.

Atong awhagon si Regional Director Edgar B. Tabacon sa Department of Public Works and Highways-Region 7 (DPWH-7), nga iyang sutaon ang maong trabaho diha sa highway sa Compostela kay sa akong obserbasyon, wa motuman sa lagda ang kontraktor sa pagbutang sa husto nga traffic direction ug safety sign sa highway diin gisirad-an ang pikas bahin.

Ato usab nga awhagon si Atty. Brandon Rey P. Raya, ang chief legal sa DPWH-7, nga maoy tigpatoman sa mga kontrata sa DPWH, aron iya usab matan-aw ang kakuwang sa pagbutang sa safety direction ug traffic sign diha sa highway sa Compostela diin gisira ang duha ka lane sa dalan.

Bisan kon ang trabaho nga gipahigayon diha sa highway dili proyekto sa DPWH, apan basi sa akong nahibaw-an nga dunay lagda ang DPWH, nga kon dunay trabahoon sa highway nagkinahanglan kini og pagtugot sa DPWH, ingon man sa lokal nga kagamhanan kon ang gitrabaho mao ang dalan sa lungsod o dakbayan.

Ang lagda nagmando sa kontraktor sa pagbutang sa husto nga traffic direction ug safety sign aron maabisohan ang mga drayber, nga dunay gitrabaho sa highway sama sa pagbutang og notisya sa proyekto 50 metros ang gilay-on gikan sa gitrabaho nga dapit; pagbutang og bollard nga magbahig sa duha sa ka lane nga gihimo nga two-way; ug direksyonal nga suga alang sa gabii.

Kining tolo ka butang nga akong gihisgotan sa unahan wala gibuhat o gituman sa kontraktor diha sa highway sa Compostela. Simbako lang tabokon ang pito ka lawod, kanang pagsira sa duha ka lane sa highway nga walay husto nga traffic direction ug safety sign delikado kaayo labina kay highway, nga ang kadaghanan sa mga drayber mopabulhot og padagan. Mas delikado sa gabii kay ang highway walay suga.

Simbako dunay bangga sa sakyanan dihang dapita tungod sa kakuwang sa traffic direction ug safety sign ingon man suga sa gabii, segurado ko nga gukoron sa tangtungod ang kontraktor ingon man ang mga opisyales sa DPWH-7 tungod sa pagpabaya ug wala pagtoman sa mga reglamento.

***

Karon nga miubos na ang mga natakdan ug nasakit sa Covid-19 dinhi sa dakbayan sa Sugbo, Mandaue ug Lapu-Lapu, ug sa probinsya, dili na ta mokumpiyansa kay mao ni ang nahitabo sa miaging upat ka buwan dihang wa na motuman ang kadaghanan sa mininum health protocols sama sa husto nga pagsul-ob sa face mask tungod kay niminos ang mga naigo sa virus sa pagtapos sa miaging tuig.

Gawas sa pagtuman sa minimum health protocols, magpabakuna usab ta, labina kadtong hangtud karon nahadlok ug nagduhaduha pa samtang libre pa ang bakuna batok sa Covid-19.


VIEW COMMENTS
DISCLAIMER:

SunStar website welcomes friendly debate, but comments posted on this site do not necessarily reflect the views of the SunStar management and its affiliates. SunStar reserves the right to delete, reproduce or modify comments posted here without notice. Posts that are inappropriate will automatically be deleted.


Forum rules:

Do not use obscenity. Some words have been banned. Stick to the topic. Do not veer away from the discussion. Be coherent. Do not shout or use CAPITAL LETTERS!